Khliehriat, risaw 14: Ka MLA jong ka Sutnga Saipung, ka Kong Santa Mary ha ka 14 tarik Risaw, 2025 (sngi Ba-ar) ka la plie paidbah ïa ka madan futsal ha shnong Ratacherra, kaba hap hapoh ka elaka Narpuh bad kaba don ha khappud Assam bad ka ri Bangladesh.
Kane kadei kawei pat ka madan futsal ha East Jaiñtia Hills District kaba la shna lyngba ka skim kaba wan na ka District Mineral Funding (DMF).
Haba ai jingkren, ka Kong Santa Mary ka la shim ïa ka kabu ban pynkynmaw biang ba ka jingthmu da kaba shna ïa kum kine ki madan hapoh u pud u sam jong ka District ka long halor ka thong ban tehlakam ïa ka jingkynrei u drok bad ban wanrah ïa ka jingsngewtynnat sha ki khynnah samla ban beh sha ka kam ïalehkai.
Ka la kular ruh ban shna ïa ka kynroh kaba don ha jan ka jaka ba don ka madan futsal kaba la mang T15 lak tyngka khnang ban pynlong ïa kane ka madan kan neh bad kan skhem, da kaba pynbna ruh ban shna sa kawei ka madan futsal ha shnong Umkiang ruh.
Na ka liang jong u Deputy Commissioner, East Jaiñtia Hills District,u Shivansh Awasthi, IAS u la pynpaw ka jingsngew nguh ïa u Rangbah Shnong Ratacherra bad ki dkhot ka dorbar shnong kiba la ïarap ha ka por ba dang pyntrei ïa kane ka madan, bad kyrmen bad kane ka madan kan iarap kyntiew ïa ka kam ïalehkai na ka bynta ki khynnah samla jong ka shnong.
U Awasthi u la ai ruh ka jingïaroh ïa ki kam pynroi bad ki kam ba radbah kiba na ki project jong ka District Mineral Funding (DMF) bad ïa ka jingtrei shitom jong kito kiba peit ïa ki kam ka DMF naduh u bah Dapmaiñ Shylla kumjuh ruh u Engineer ka DMF kiba la trei shitom bad jurip man ka por naduh ba sdang ka kam.
Na ka liang u Waheh shnong ba rim jong ka shnong Ratacherra, u bah Pynkhlaiñbor Dhar, u la pynpaw ïa ka jingsngew nguh ïa ka MLA bad ïa u Deputy Commissioner kiba la pynurlong ban wanrah ïa kane ka madan futsal hapoh shnong kaba long ka jingkyrkhu na ka bynta ki khynnah ban beh sha ka kam ïalehkai.
Kum ban shu bynrap ïa ka jingshna ïa ki madan futsal ha East Jaiñtia Hills District kiba na ka skim jong ka DMF la sdang na Khliehriat kaba dei ka District Headquarter kata ha u snem 2024 bad hadien kane la nang iai bteng shuh shuh ïa ka jingshna ïa ki madan futsal sa sha kiwei kwiei ki shnong ruh, wat shaduh ki shnong ruh kiba jngai na District Headquarter na Khliehriat kum ha shnong Saipung, Sohkymphor, Mukhaialong bad kiwei kiwei ki shnong
Ha kane ka prokram ha Ratacherra la ïa don ryngkat lang ruh u BDO, Lumshnong C&RD Block, u bah M. Kyndait, ki dkhot ka dorbar shnong Ratacherra, u MDC ba rim ka Narpuh, u bah D.Pohshna, ki nongshong shnong, ki khynnah skul, ki nonghikai bad kiwei kiwei ki riew rangbah na ka thaiñ.
