Jowai, Risaw 15: Ka resol jong ka lympung ïalehkai phutbol jong ka kyrdan 13th Chatister Kharkongor Memorial Trophy 1st Division Football Tournament-2025 bala pynïaid daka West Jaiñtia District Sports Association (WJDSA) kaba la long hynne ka sngi Balang, 15 tarik Risaw, ha madan Kiang Nangbah Stadium Dongmihsngi, Jowai.
Haba phai sha ka jingïakhun jong kane ka sngi la ïohi ïa ka Lion Sports & Youth Affairs kaba la lah ban pynliem noh da 3-0 kol ïaka Nangbah Iawmusiang.
Ka Lion Sports & Youths Affairs ka la pynkhihjar nyngkong lyngba u Poibiang Pohshna haka minit ba 8 ha ka kylla step, shuwa ba u Edius Laloo (76’) bad u Prosperwell Dhar (78’) kin pynskhem ïa ka jingjop da kaba thep sa ar tylli ki kol ha ka kylla miet.
