Shillong, Risaw 15: Ka Laitkor ka la lait na ka jingma ban shah pynhiar kyrdan da kaba pynliem noh ïa ka Sawmer da 2-0 kol ha kawei naki jingïakhun jong ka Shillong Premier League 2025 kaba la long ha ka janmiet jong ka sngi Balang, 15 tarik Risaw, ha madan First Ground-SSA Stadium, Polo.
Ha kane ka jingïalehkai ka Laitkor ka la pynkhihjar ha baroh ar tylli ki kylla lyngba u Giovanni Syiemiong (30’) bad u Rikmenlang Nongrum (64’) ban khur ïa ka jingjop.
Ka jingjop ka la kyntiew ïa ki sha ka 11 poiñ bad ka la kiew lai kyrdan ha ka miej sha ka kyrdan ba san. Ka Sawmer, da kaba kamai 9 point, ka la hiar kawei ka kyrdan sha ka kyrdan kaba hynñiew. Kane ka dei ka jingïakhun ba khatduh jong ka Laitkor katba ka Sawmer ka dang don sa kawei ka jingïalehkai ban pyndep.
Mynta ka Laitkor ka la ïaryngkat bad ka Mylliem da 11 poiñ. Hynrei ka Mylliem kan ïakhun ïa ka jingïakhun kaba khadduh jong kane ka samoi pyrshah ïa ka Rangdajied United mynta ka sngi ha ka por 4:30 baje janmiet. Na ka liang jong ka Rangdajied, ka ïaryngkat bad ka Sawmer da 9 poiñ.
