Shillong, Risaw 15: Ka jingïalehkai plate group jong ka Ranji Trophy 2025-26 hapdeng ka Meghalaya bad ka Mizoram kaba la thmu ban sdang naduh hynnin ka sngi Balang kam shym la lah satia ban ïaid shakhmat namar ka jingsngem ka madan.
Kane ka jingïalehkai ka la dei ban sdang ha ka por 8:30 baje mynstep ha MCA Ground ha Polo hynrei u slap uba jur ha ki sngi ba la dep ka la pynlong ïa kawei ka bynta jong kane ka madan kaba don hajan ka JN Stadium ban sngem.
Ki Ground staff ki la trei baroh shisngi ban pyrshang ban pynsted ïa ka jingpynrkhiang ïa ka madan hynrei hadien ka jingjurip ha ka por 2baje janmiet ki umpire u Vinod Ingle bad u Dharmesh Kumar Bhardwaj ki la rai ban pynkut noh ïa ka sngi khlem kano kano ka jingïakhun.
Ha ka por mynsngi u lyoh uba dum u la sdang ban ker sawdong ka madan kum ka dak ban pyni ban nang jur shuh shuh u slap. Hynrei la khmihlynti ba ka suiñbneng kan rang bha mynta ka sngi.
Watla kam shym la don ka jingïalehkai, hynrei na ka liang jong ka Meghalaya Cricket Association ka la ïoh pat ba kan pynlong ïa ka prokram pdiang bad pynkup burom ïa ki umpire, u match referee Amit Pathak, senior video analyst Utpal Das bad u Neutral curator jong ka BCCI u B Talukdar. Kiba la mihkhmat ïa ka MCA ki long u Nababrata Bhattacharjee-President, Bah Rayonald Kharkamni-Honorary Secretary, Dhrubajyoti Thakuria- Honorary Treasurer bad u Bah Gideon Kharkongor-Apex Council Member.
U President ka MCA u Nababrata Bhattacharjee u la ai ka jingkren lyngkot ha ka por mynstep hakhmat ki nongïalehkai bad ki nongkitkam kiba la ïalum lang bad u la pdiang burom ïa ka kynhun ïalehkai jong ka Mizoram hangne ha nongbah Shillong.
