Seng ka BAF ïaka Astronomy club ba nyngkong ha jylla, sakhi ki heprit ïaki metbneng haki haw haw

Nongpoh, Lber 19: Ka Bharti Airtel Foundation haka jingïatreilang bad ka Shillong Science Centre NEHU, ka la ïoh ban seng ïaka Astronomy Club ba nyngkong haka jylla ha ka skul Grace Foundation Secondary School, Lumsohpieng bad ban aiti ruh ïa ka kor khmieh met bneng ne ka Telescope bala tip haka ktien nongwei sha katei ka Club khnang ba ki khynnah pule ki ba don ba katei ka kynhun kin ïoh ban khmieh da la ki jong ki khmat ïaki met bneng ba don haka haw haw, ym tang haki kot pule.
Ïa katei ka Astronomy Club la wan ban pynlait paidbah hynnin ka miet da ka Kong E. Synrem BMC Bhoirymbong Block kum ka kongsan, haka jingdon lang u Rahul Chatterjee, Space Science Experts, u bah Isynei Hinge MDC Umroi Constituency, bah Manbha Khonglah Project Coordinator Bharti Airtel Foundation, Kong Oltricia Warjri Administrator ka Grace Foundation Secondary School Lumsohpieng lem bad ki nonghikai ki kmie ki kpa bad ki khynnah skul.
Lyngba katei ka sngi ki khynnah skul jong ka Grace Foundation Secondary School Lumsohpieng bad kumjuh ruh na kiwei ki shlem hikai ai jinghikai ka thaiñ Bhoirymbong hynnin ka miet kila ioh ban sakhi da la ki jong ki khmat ïaki met bneng haki haw haw lyngba ka telescope bala aiti da ka Bharti Airtel Foundation ïa kaba kum ki briew ngui shem jingeh ban iohi da la ki jong ki khmat.
Naka liang ki nongmihkhmat naka Bharti Airtel Foundation ki la pynpaw ba kane ka Foundation mynta ka la dap 25 snem ka jingïaid lynti bad kane ka dei ruh ka Astronomy Club ba nyngkong eh bala sdang hapoh ka jylla bad ka jingthmu ba hakhmat ka long ban nang pynïar ïaka jingstad bad ka jingshemphang haki khynnah pule ha kaba ïadei bad ka jingstad saian ym tang haki kot pule hynrei ban sakhi da la ki jong ki khmat ïaka haw haw bad kila ïathuh ruh ba ka Foundation ka don ka jingangnud ban nang pynkha shuh shuh sa kumba 5 tylli ki Astronomy Club sa sha kiwei pat ki skul haka them Ri-Bhoi.
Ka Kong O Warjri Administrator ka Grace foundation Secondary School, ka la pynpaw ba kum ki nonghikai ki dap shisha daka mynsiem kaba kmen bala sdang ïa katei ka Astronomy Club ha katei ka skul, bad kane kan pynsngewtynnad ïaki khynnah ban pule bad tip ïaki met bneng bad pynsuk ruh ïaki nonghikai bad lyngba katei ka sngi hadien bala seng ïa katei ka Club naka liang ka kong Warjri kala pynshlur ruh ïa ki khynnah pule khamtam naka thaiñ Bhoirymbong ba kin ïasnohkti lang bad kane ka club ban ai mynsiem ïaki khynnah ban pule ïaka saian.