Lyngba ka Lehñiam Thoh Langdoh :Khot wer u Dolloi ïa ki paidbah ban long kiba tip ban kheinkor ïa ki jingkyrkhu ka Mei Mariang

Jowai, Lber 19: Ka Raij Jowai kumba ju long man la u snem mynta ka 19 tarik Lber, hapoh ka jingpeit jingpynïaid u Dolloi kum u khlieh ka Niam Khlieh ka Elaka ryngkat ki Shakri niam, ki Phra Kur Phra Kmai, ki riew rangbah bad ki khun samla ka Seinraij, Jowai ki la shim ban pyndep ïa ka lehniam Thohlangdoh hakhmat ka duwan pyndep niam ba don ha Khloo Langdoh.
Kane ka jinglehniam ka long shibynta ban ainguh aidem ïa u Lei Langdoh na ka bynta ki jingkyrkhu ba la ïoh bad ruh ka long shibynta ka jingpynkyntang ki khun ka Raij ia ka Mei mariang kaba la theh sei ki jingkyrkhu ïa u khun bynriew ha baroh ki liang.
Ïa kane jinglehniam ne knia ainguh hakhmat ka duwan u Moo Langdoh la pyndep da u Sangot Paswet ha ryngkat ka jingsynranlang u Sangot Pakyntein bad u Sangot Pasubon kiba dei ki lai Sangot jong ka pateng khun pateng ksiew ka Kur Sookpoh Khatar Wyrnai.
Nalor ka jinglehniam ha kane ka sngi, ha ka jingpynïaid u Pator kum u shongknor la pynlong ruh ïa ka Dorbar Niam ha kaba la ïashimbynta da ki kñi, ki riew rangbah bad ki khun samla ka Seinraij bad ka mat ba la ïa kren ïatai kyrpang ha kane ka sngi ka long halor ka nongrim ban pynjanai ïa ki kam niam kiba ïadei ha la ki ïing I sem bad ha ka Raij ka Shnong.
Na ka liang u Dolloi Waheh Puramon Kynjing haba ïakren u la ïathuh ba ka nongrim jong ka jingpyndep niam ha kane ka sngi ka long ba ki khun ka Raij ka shnong ki pyni ka jingburom bad kheinkor ia ka Mei mariang kaba la theh sei ki jingkyrkhu ïa u khun bynriew ha baroh ki liang bad ha kane ka sngi kat kum ka adong niam ki khun ka Raij kim bit ban trei ban ktah ne ban leh kino kino ki kam da kaba pynjot bad pynsniewdur ïa ka mei mariang bad ki sawdong sawkun jong ka.
Shuh shuh na ka liang u Dolloi u la ong ruh ba na kane ka jingpyndep niam, kum ki pateng kane ka juk ngi ïoh ka jinghikai kumno ba ngin long kita ki briew kiba tip ban saindur bad pynjanai ïa ka pyrkhat pyrdain, longbriew manbriew khamtam ha ka jingiadei bad ka Mariang bad u ai ruh ka jingkitbok kitrwiang bad ki kyntien ai mynseim ïa baroh ki khun ka Raij, ka Elaka ka ri bad ka jaitbynriew ba kumba ka Raij Jowai ka lah ban pyndep ïa kane ka jinglehniam mynta ka sngi hapdeng ka jingshongkun shongblei, u khmih lynti ba ka jingpyndep ia kiwei ki kam niam hapoh ka Raij ka Elaka ha ka nongrim jong ka Shad Ñiam Behdieñkhlam kin long kiba ïaidbeit ïaidryntih bad iphuh iphieng.