Nongpoh, Lber 20: Tang hadien ba ka Election Commission of India kala pynbna ïaka tarik ban jied ïaki nongmihkhmat sha ka iing Dorbar thaiñ jong ka Lok Sabha, ki bor pulit ka Ri-Bhoi kila sdang ban pyrkhing ïaka ïaid ka ïeng jong ki kali paidbah ban pynlong ruh ki jingtalasi ïaki kali haka thaiñ Nongpoh hadien bala pyntreikam noh ïaka Model Code of Conduct haka jylla Meghalaya.
Kum ban shu kdew hangne ba u District Magistrate ka Ri-Bhoi u Arpit Upadhyay u la pynjari ïaka kyndon aiñ 144 CrPC ha Ri-Bhoi District ban teh kyndon naka bynta ka jingïaid beit ïaid ryntih ka elekshon MP sha Lok Sabha ban sa long haka 19 tarik Ïaiong.
Naka liang ki bor pulit ka Ri-Bhoi kila pynthikna ban wanrah ka jingshngaiñ sha ki paidbah bad pynlong ruh ka jingtalasi haka thaiñ Nongpoh ryngkat ki pulit CRPF ba kan nym don kano kano ka jingpynthud shuwa ka elekshon MP haka jylla.
