Nongstoiñ, Lber 20: Ki jaidbynriew Nepali kiba shong ba sah ha ka thaiñ Langpih hapoh ka shatri jong ka Kamrup Jilla Gorkha Kalyan Samiti, ha ka taiew ba la lah ka la ïoh ban pynlong ïa ka jingïalang paidbah kaba 10 kum ka jingïakynduh lang ki paid Nepali kiba don ha ka jylla Assam.
Ïa katei ka jingïalang paidbah la ïoh ban pynlong ha kawei na ki shnong kaba ki Khasi ki ju khot ne sien kum ka Lawbah, kaba dei ruh ka jaka ïa kajia khappud hapdeng ka jylla Assam Meghalaya. Pynban la ju sien ne khot ruh ïa katei ka shnong kum ka Harsha Nagar da ki Nepali, kaba ka Assam ruh ka ju kam ba ka dang hap hapoh u pud u sam jong ka.
Ha katei ka jingïalang kaba la neh kumba ar sngi la don shibun ki jingpynbyrngia bapher bapher, kynthup naduh ka shad ka rwai, ka put ka tem tynrai bad ka kynhun kum ka dak jong ka jingai mynsiem. Ban pynshlur ïa ki samla pule la ai ruh ïa ki khusnam sha kiba la wan shakhmat ha ki jingpule.
U Nilamani Upadhay President ka Gorkha Kalyan Samiti, u Arjun Chettri Rabha Hasong Autonomous Council, u Bikas Chettri President Reception Committee bad u Sambu Chettri Secretary ka Gorkha Kalyan Samiti, u R.G.Momin MLA katei ka thaiñ bad kiwei kiwei, ki la donlang ban ai mynsiem.
Katei ka seng ka la ong ruh ban ïawer ïa ki paid nongshong shnong jong katei ka thaiñ kiba dei ki Khasi, ban don ka jingïatiplem bad ban ïa im kum shi para wat lada don la ki rukom bapher bapher, la ka long ha ka riti dustur ne ha ka mane Blei pynban baroh ki long hapoh ka Ri India ym kum ki nongwei.
