Nongstoiñ, Lber 20: Kawei ka Shlem ai jinghikai ha ka put ka tem kaba don ha Mawïong Pyndengrei kaba la tip ruh kum ka Art and School of Music, kaba la register ruh ha ka sorkar, ha ka taïew ba la dep ka la ïoh ban plie paidbah bad ban pdiang admission noh ruh shisyndon ïa ki khynnah kiba kwah ban leit pyntbit ha katei ka Shlem ai jinghikai.
Ïa katei ka shlem la plie paidbah da u Dr. Dameshwa Lyngdoh kum u kongsan ha ryngkat ka jingïadonlang u Pastor S.L Lyngkhoi u ba dei uwei na ki nonghikai tem ba nyngkong eh ha ka thaiñ Nongstoiñ.
Kum shi bynta ban pynshit pynshngaiñ shuh shuh ïa katei ka sngi, la ïoh ïa ki jingrwai kyrpang bad jingtem kyrpang na ki samla, kynthup na ka Kid’s Tarari, ka Khmih bad kiwei kiwei.
Ha kajuh ka por utei u kongsan u ba dei u Doktor u la pynktik mynsiem ruh ïa ki paidbah, namar ka jingpyni sap tem lang jong u lyngba ka jingtem kaitar (guitar) ha ki sur kiba sngew thiang.
Ha katei ka jaka ka don ruh ka music studio recording kaba la pynïaid da uwei na ki samla jong katei ka shnong Mawïong Pyndengrei.
U kongsan haba ai jingkren u la ong, “Lada ngim lah ban pynsngew tynnad shuwa ïalade yn ym lah ban pynsngew tynnad ïa kiwei lyngba ki jingput jingtem, kumta kat kaba phi leh dei ban leh naduh ka mynsiem” ong utei u Doktor.
