Nongstoiñ, Lber 20: Ka Joint Action Committee jong ka Local People Kynshi Hydro Power Project, hapoh ka jingïalam jong u Bah Zandy Myrthong u ba dei u Secretary jong kane ka kynhun, ka la leit buh dorkhas hakhmat u myntri sorkar ka jylla Meghalaya u ba dei u Minister Incharge jong ka tnad Power Department jong ka Sorkar Meghalaya kata u A.T.Mondal.
Katei ka Dorkhas ka dei ban pynsngew ïa ka jingsahteng jong ka Kynshi Project kaba la ïa buh ka jingïasoi soskular ne Sign Agreement hapdeng ka M/s Anthena Pvt Ltd naduh u snem 2007, ha ka por jong Mukul Sangma u ba bat kum u power minister jong ka Sorkar barim ha katei ka snem.
Kane ka Committee ka la kyrpad ruh na u A.T Mondal ba un sngewbha ban khot tender thymmai ha kaba ïadei bad ka Kynshi project. Ka kynhun ka la kyntu ruh ban pynrung ïa ki trai jong ka dong ka thaiñ ban ïa don bynta lang, khnang ba ka kam kan ïaid beit ïaid ryntih haba ïadei bad kane ka project. Kan long kum ka lad ïoh kam ïoh jam ïa ki khun samla jong ka dong ka thaiñ ha kum kane ka juk kaba hiran ha ka kamai kajih.
