Ka Regional Democratic Alliance (RDA) kaba long ka kynhun jong ka United Democratic Party (UDP) bad ka Hill State Peoples Democratic Party (HSPDP) ka la ïakynduh mawsiang bad mad ïa ka jakhom khait hadien ba ka ktem jong ka United Democratic Party (UDP) ka la pra phom ha Ribhoi District shwa ba ka jylla Meghalaya kan leit sha ka elekshon Lok Sabha ka ban sa long ha ka 19 tarik u Ïaiong, 2024.
Ha Ribhoi kaba don san tylli ki Constituency ka United Democratic Party (UDP) ka la jop tang ar Seat ha ka elekshon Assemly kaba la long ha u snem 2023, kata, tang na Nongpoh bad na Umroi. Hynrei watla katta ka jingïoh vote jong ka UDP ha them Ribhoi ka shu ïaryngkat bad ka Congress kaba jop ar Seat, kata, na Umsning bad na Mawhati, katba ka NPP ka la jop tang Jirang
Kat haduh mynta, ym pat lah satia ban sngewthuh ïa ka jingleh phoi jong ki nongïalam ka UDP ha them Ribhoi bad lehse katkum ba lah ban shu ïoh ksai malu mala imat ka lah ban don ka jingbym suidniew ne ka jingkhein briew jong ki nongïalam ka UDP khamtam ïa ki nongïalam baradbah ka UDP ha them Ribhoi khamtam ïa u Bah Donbok Khymdeit uba dei u President jong ka UDP Ribhoi bad u MLA barim jong ka Mawhati.
Kane ka jingresaiñ jong ki nongïalam ka UDP na them Ribhoi ka la pyntron ïa ka RDA kaba dang ïakhun dohïap ban rung sha manla ki shnong ki thaw ban pan jingkyrshan na ka bynta u kyrtong u Bah Robert June Kharjahrin uba dang khmihlynti ïa ka jingïatylli jong ki nongtrei bashitrhem ka UDP bad ka HSPDP.
Toi, watla ka UDP ka la jop 12 Seat ha ka elekshon Assembly watla katta kam pat lah ban shu khein shngaiñ namarba ka HSPDP ruh ka jop tang ar Seat ha ka elekshon baladep.
Kane ka jingjia kaba pynkyndit ïa ki nongïalam ka UDP mynta ka sngi, ka la pyndiaw mynsiem bha ïa u kyrtong ka RDA u Bah Robertjune Kharjahrin uba la trei borbah ban tur sha ki kyndong kyshrot jong ka jylla ban pan jingkyrshan na ki paidbah ha kane ka kynti.
Ka jingbym ïasngewthuh jingmut hapoh ka UDP ka la nang aibor ïa kiwei pat ki party kiba don ïa ki kyrtong ban pynïakhun ha ka elekshon Lok Sabha namarba mynta ki nongïalam ka UDP ha them Ribhoi kiba la mih noh na kane ka party ki la long kiba laitluid ban jied ïa uno uno u kyrtong ha ka elekshon namarba kim pat shim rai satia sha kano ka party kin leit ban pynïasoh.
Watla ki nongïalam ka UDP Ribhoi kim shym la ai satia ïa kano kano ka daw ba ki la mih noh na ka party hynrei kat kumba lah ban sngewthuh ki lah ban leit pynïasoh bad ka NPP kaba bat ïa u lakam synshar ha ka jylla.
Namarba ka jingbym don kyrtong ka Trinamool Congress ha Shillong Seat, ka Trinamool Congress ha Mawkyrwat Constituency ka la ai laitluid ïa ki nongkyrshan ban ai kyrshan ïa kano kano ka party kaba ki sngewbit bad kaba ki imon.
Lehse kane ka elekshon Lok Sabha mynta ka kynti ka dei ka elekshon kaba sakma ki nongbud haba ki nongïalam kim lah ban wanrah ïa ka jingïatylli hapoh kawei ka sem.
Ka kabu ksiar mynta, ka ap ïa kiwei pat ki party namarba kine ki nongïalam ka UDP ha Ribhoi kin ym lah ban shu shong kli kti hynrei kan don beit ka jingpyrkhat shaei ban leit snoh bad ïano ban ai jingkyrshan ha kane ka kynti. Ka por kam slem shuh bad sa tang hapoh khyndiat taiew shwa ban wan ka elekshon u paidbah un sa ïoh ïa ka jubab kaba shai shano kine ki nongïalam ba la phet na ka UDP kin leit riehtngen.
