Nongpoh, Ïaiong 29: Hadien katto katne por bala kynjah biang ka jingtalasi ki pulit ka Ri-Bhoi naduh bala mih u VS Rathore kum u SSP naka district, la iohi ba ki paidbah kim kheiñ snep shuh bad kila sdang ban klet bad ban lehmon biang ha surok bah bad bun ki jingjia aksiden kila sdang ban kynrei biang kaba la wanrah ki jingmynsaw bad ki jingiap briew ha bun jaka ha Ri-Bhoi.
Halor kane ka bynta ki pulit ka Ri-Bhoi hynnin ka miet kila mih pyrthei biang ban ai jinghikai bad jingsneng ïaki paidbah kiba ñiah kali ha surok bah National highway naduh ki 2 shaka, ki kali rit, bad kumjuh ruh ïaki trok bad lyngba kane ka jingsdang talasi biang naka liang ki pulit kila phah ka khubor kaba shai sha ki paidbah ba phikir ïalade, ïala ka jingim bad ka jingim kiwei de kumjuh da kaba bud ryntih ïaki kyndon aiñ ñiah kali.
Ha kane ka jingtalasi bala pynlong ha Byrnihat ha don ryngkat ruh da u Bah Bankerlang Marweiñ DSP, u Rubul Ali OC ka Byrnihat Police Station, u Michael Marak OC ka Nongpoh Police Station lem bad kiwei kiwei ki pulit ophisar.
Shuh shuh ha ka jingtalasi la snohkitlang ruh da ki nongïalam ka RBYF Byrnihat Circle hapoh ka jingïalam u Samla Ricky Lapang President bad u samla Frankie Ranee Vice President ryngkat ki dkhot kiba la ïarap lang ïaki pulit ban bat ïaki kali ha surok bah bad la lap ba bun naki paidbah kim burom ïaki aiñ ñiah kali, khlem da phong ïaki helmet, kiba dih kyiad haka por ba ñiah kali ha kaba ki pulit kila daiñ kuna katto katne ryngkat ka jingsneng bad jinghikai ba kane ka jingtalasi kan dang bteng ha ki sngi ban wan.
