Nongpoh, Ïaiong 28: Kum ka jingtehlakam ïaki briew kiba jui mlien ban pynmih tdem bad dih duma haki jaka paidbah khamtam hajan ki jaka pule, ki pulit jong ka Nongpoh Police Station kum ka jingpyntreikam ïaka aiñ, Cigarettes and Other Tobacco Products Act (COTPA), 2003 mynta ka sngi kila leit ban daiñ kuna bad kumjuh ruh ban ai jinghikai sha ki paidbah ba kim dei ban pynmih tdem haki jaka paidbah, khamtam hajan ki jaka pule namar kane ka ktah shi katdei ïa kiwei pat kiba ring mynsiem lyngba katei ka tdem.
Naka liang ki pulit jong ka Nongpoh kila leit ruh ban rung sha ki dukan kiba don hajan ki skul ba kim dei ban die ïaki duma sha ki khynnah bad ki dei ruh ban da thoh da ka jingthoh kaba shai haki dukan bala khang pyrshah ban die ne dih duma.
Ïa katei ka sienjam la shim ruh da ki pulit kum shibynta ban wanrah ïaka imlang ka sahlang kaba koit ba khiah, namar ka jingdih duma haki jaka paidbah ka ktah shisha ïa kiba bun ki paidbah khamtam kiba dang rit ka rta, namar ka jingdih duma haki jaka paidbah khamtam hajan ki skul la khang pyrshah lyngba ka COTPA Act.
Shuh shuh naka liang pulit kila kyrpad ruh sha ki paidbah ban husiar ka dih duma bad pynmih tdem haki jaka paidbah, ioh kin ngat haka kuna, bad lyngba kane ka khubor kan long ruh kum ka jingmaham ïaki paidbah ha kylleng ka Ri-Bhoi District ban burom ïa kane ka hukum nangne shakhmat.
