Sdang ki bor Distrik ban weng ïa ki waïar ba noh rynjaiñ kylleng ka nongbah Shillong

Shillong, Nailar 19 : Katkum ka jingbthah jong u Myntri Rangbah ka jylla Meghalaya, ki bor pynïaid District jong ka East Khasi Hills ha ka sngi Balang ki la pynlong ïa ka jingleit weng ïa ki waïar ba bunjait kiba noh bad tawah ha kylleng ki bynta jong ka nongbah Shillong.
Katkum ka kyrwoh la ïathuh ba kane ka jingweng ïa ki waïar ka la sdang naduh ki bynta jong ka Ophis DC, IGP bad Raj Bhavan, ha kaba la lap ba bun ki waïar ki tawah ha ka rukom kaba khlem da pynbeit. Kane ka pynsniew ïa ka dur jong ka nongbah bad ka lah ruh ban wanrah ïa ki jingeh kiba ïadei bad ka jingshngaiñ bad ka jingïaid paidbah.
Na ka liang ki bor distrik ki la sdang ïa kane ka kam kum shi bynta ban pynkylla dur ïa ka nongbah, ban pynkhlaiñ ïa ka jingshngaiñ ki paidbah bad ban pynbeit ryntih ïa ka rukom buh bad pyndonkam ïa ki tïar ki tiar ba dei bad ka jingshakri ïa ki paidbah ha ka nongbah.
Ki bor distrik ki la kyntu ruh ïa ki agency, ki service provider bad ki cable operator kiba don bynta ban pynthikna ba ki waïar ne ki cable ba ki pynïaid kin dei kiba la pynbeit bha bad sumar bha ïa ki. Ki la bthah ruh ba ïa ki waïar kiba ym donkam shuh ne kiba la sangeh ban pyndonkam dei ban weng noh.
Shuh shuh ki la ong ba kin dang bteng biang ïa ka kam ha kiwei pat ki jaka kiba la jied, khnang ban pynlong ïa ki jaka paidbah ha Shillong kiba khuid, shngaiñ bad kiba la pynbeit ryntih.