Shillong, Kyllalyngkot 6 : Ka lyer jongka Congress ka la sdang ban kaweng bha ha ka Sutnga -Saipung Constituency kaba dei ka Constituency kaba u khlieh duh jongka Congress ha Meghalaya u ma Vincent H Pala un ïa aireng ha kane ka election MLA 2023 ka ban sa long ha u bnai Rymphang mynta u snem.
Mynta ka sngi ha ka jingïalang ba la long ha ïing jong u ma Pala ha ka shnong jongu ha Lamyrsiang, bun bah ki dkhot bad nongïalam jong ka NPP, UDP bad BJP ki la wan ban pynïasoh sha ka Congress. Kine ki la wan da ka jingthrang ban ai ka jingkyrshan ba pura ïa u ma Vincent Pala ba un ïoh ïa ka jingjop ba don burom ha kane ka kynti. Kane ka jingïalang jongka Block Congress ka dei kaba la lum lang ïa ki nongtrei ba shitrhem ka party na ki lai tylli ki Elaka ka Sumer, Sutnga bad Nongkhlieh.
Hadien kane u ma Vincent un sa leit ban pynlong ïaka jingïalang sa ha Narpuh Elaka bad ha ka thaiñ ba sah ki Biate.
Haba ïakren bad u nongthoh khubor u ma Vincent H Pala u la ong ba ka lyer jongka Congress ka la beh bha mynta ha ri lum Jaintia bad ka don ka jingkyrmen ba ka Party kan jop bun ki kyrtong ha kane ka kynti.
“ Ka thong jongka Congress ka long ban ïalam ïa ka jingsynshar sa shisien pat ha kane ka jylla Meghalaya namar ki paidbah ki la kwah ban wanrah ka jingkylla ha ka synshar khadar namar ki la ïohi kaei kaba la jia ha kine ki san snem ba la synshar da ka sorkar MDA. Ym donkam shuh ban dang batai hynrei wat ki khyllung khynnah ruh ki la ïohi lut ïa ki kam bamsap ba kane ka sorkar ka la leh im im peit peit” ong u ma Pala.
Uwei na ki nongialam ba radbah jongka NPP uba dei ruh u President ka NPP Sutnga Block u ma Thijlang Shyrmang u la wan ban pynïasoh bad ka Congress bad la thung ruh ïa u ban long u President ka East Jaintia Hills Congress Committee.
