Shillong, Rymphang 26: Kum shi bynta ban pynkhreh bad jied ïa ki nongïalympat ban mihkhmat ïa ka jylla sha ka 3rd North East Olympic Games 2024 ha Nagaland, ka Wrestling Association of Meghalaya ka la sdang ban pynlong ïa ka jingpyrshang jied nongïalympat ha jaka kilanmet jong ka Happy Red Rooster gym kaba ha Laitumkhrah hynnin ka Sngi Thohdieng.
Lah ban kdew ba ka 3rd North East Olympic Games 2024 ka ban long ha Nagaland kan sdang naduh 18 tarik bad kut haduh 23 tarik u Lber, bad kin don haduh 16 tylli ki jait jingïalehkai ba la kynthup.
Na ka liang jong ka WAM ka la trei shitom katba lah ban pynkloi ïa ka jingjied ïa ki player shuwa ban pynlong sa ïa ka prokram ai jinghikai ban pyntbit shuh shuh lane coaching camp na bynta kito kiba la shah jied.
Ka WAM ka la pyntip ba kan phah ar ngut ki nongïalympat ki ban aireng ha ar tylli ki kyrdan ïakop– ba kynthup ïa ka belt wrestling bad ka freestyle wrestling.
Haba phai sha ka Belt wrestling, ka jingïalehkai kan kynthup ïa arngut ki nongïalympat kiba hap ban bat skhem ïa u belt jong u wei pat ha ka jingpyrshang ban pynkyllon lane lympat u wei ïa u wei. Katba ka freestyle wrestling ka dei ka jait ïalympat kaba ju ïohi barabor ha ki rynsan Olympic Games.
Kiba la wan ban shimbynta sha kane ka selection trial ki kynthup ïa kiba jop takma na ka 5th Meghalaya Games, kaba la long ha u bnai ba ladep ha Tura.
Na ka liang jong ka WAM kam pat shym la pynbna ïa ka thup kyrteng jong kitei ki nongïalympat, bad ka synjuk ka dang ap ruh ïa ka jingbthah ha kaba ïadei bad ka mang tyngka na bynta ban pynlong ïa ka coaching camp bad ruh ban leit sha Nagaland na ka Meghalaya State Olympic Association bad ka Department of Sports & Youth Affairs.
