Nongpoh, Ïaïong 26: Kumba la pynkup bor katkum ka Section 61 jong ka Meghalaya Police Act, 2010 ba la ai bor ban thung ïa ki Village Defence Party (VDP), ka tnad Pulit na Ri Bhoi ka la sdang ban thung ïa ki VDP shi bynta ba ki nongïalam bad ki dkhot ka VDP kin ïa trei lang bad ki bor pulit ha kaba ïa khun pyrshah ïa ki kam sniew ha ka imalang ka sahlang.
Kane ka jingsdang ka tnad Pulit na Ri Bhoi ba thaw ne thung ïa ki VDP ka la sdang ruh na ka shnong Mawrathud ba hap ha Umsohlait Police Station, ha kaba katkum katei ka Meghalaya Police Act, 2020 la pdiang ban don noh ka VDP ha katei ka shnong Mawrathud ba la mynjur da ka ophis u Superintendent of Police Ri Bhoi District ha ka jingïalam u V.S Rathore kum u Senior Superintendent of Police.
Ki nongïalam ka VDP jong ka Shnong Mawrathud ba la ai bor ruh da ka Rangbah Shnong bad ka Dorbar Shnong ki kynthup ïa u President ba la jied ïa u Osenroy Mukhim kum President, Assistant President Pikontius Shadap, Celestine Shadap Secretary, Gilbert Shadap Assistant Secretary, Batyngshain Khymdeit Treasurer, Simeon Shadap Member, Baldo Sujai Member, Shemsha Nongspung Member, Teigor Masynting Member, Pynshai Khyllait Member bad u Wanbok L. Nonglait Member.
Kine ki nongïalam bad ki dkhot ka VDP la mynjur ba kin treikam katkum ka samoi treikam ba la buh kata naduh ka 01.05.2025 haduh ka 30.04.2028 hadien ba la mynjur katkum katei ka Meghalaya Police Act, 2010.
Kumba la pynpaw ha katei ka Act, kine ki nongïalam bad ki dkhot ka VDP kin ai ka jingïatrei lang katkum ki kyndon ba la pynkup bor ïa ki da ka tnad Pulit bad kine ki VDP kin long kum kita ki nongïarap ïa ki Pulit ban ïa trei lang na ka bynta ban ïa khun pyrshah ïa baroh ki jaid jingsniew kiba don ha ka imlang ka sahalng bad ka thong hi ka long ban wan rah ïa ka shongsuk ka shongsain ki paidbah ha ki shnong ki thaw.
