Katkum ka khana samari 2011, don haduh 44, 317 ngut ki briew kiba duna ha ki dkhot met

Shillong, Ïaïong 26: Ka Bethany Society ha ka jingiatreilang bad ka EnAble India, ki la pynlong ïa ka Purple Event kaba la ai kyrteng da ka, ‘Hat Jingkyrsiew’ (Jagruthi Mela) hapoh ka campus jong ka.
Kane ka prokram ka buh ka jingthmu ban pynïoh ki lad jingtip kiba kongsan halor ka pule puthi, ki buit treikam, ki skhim sorkar, ki prokram ai jinghikai, bad ka lad kamai kajih ïa ki briew kiba duna ha ki dkhot met ne persons with disabilities (PWDs).
Ha kane ka prokram ki la don ki Interactive cell bad ki jingpyninam kiba pynleit jingmut halor ka Early Intervention, Inclusive Education, Social Welfare, Health Care, Assistive Solutions, Legal Rights and Entitlements, Self-employment, Wage Employment, Stories of Achievers-Garv Se Bazar (a marketplace celebrating entrepreneurship by PwDs) bad kiwei kiwei.
Katkum ka khana samari jong u snem 2011, ha Meghalaya ki la don kumba 44,317 hajar ngut ki briew kiba duna ha ki dkhot met ne persons with disabilities. Kane ka prokram ka ai ka lad bad ka rynsan na ka bynta ki PWD bad ki ïing ki sem jong ki ban ïoh ki jingshakri kiba bun jait bad kumjuh ruh kiwei ki lad.
U Myntri ka tnat Social Welfare ka sorkar jylla u Bah Paul Lyngdoh uba la shim bynta ha ka programme kum u kongsan u la banjur halor ka jingdonkam ban pynbha hi ïalade, bad ong ruh ba ka kamra kaba heh ha kane ka pyrthei ka dei ka jingpynbha dalade ïalade. U la pynshlur ïa kiba don ha ka prokram ban ïaid sha ka roi ka san kaba ïaibteng kaba donlang bad ka ïoh ka kot.
“Ki la donbun kiba la ïohi shai la ki jong ki khmat hynrei kim don pat kiba ïohi jngai, bun kiba lah ban ïohsngew hynrei kim ju sngap, bad bun kiba don ki kjat hynrei kim lah ban ïaid shakhmat. Kumta mano ba dei kiba duna ha ki dkhot met?” u la kynthoh.