Sdang ka SIR ha Meghalaya, palat 1.19 lak tylli ki Enumeration Form ladep sam tang ha ka sngi nyngkong

Shillong, Naitung 01: Haduh 1,19,129 tylli ki Enumeration Form la dep ban sam ha kylleng ka jylla Meghalaya ha ka sngi ba nyngkong jong ka jingrung haman la ki ïing ki sem jong ki nongshong shnong ka jylla hapoh ka Special Intensive Revision (SIR), 2026.
Ïa kane la pyntip da u Chief Electoral Officer (CEO) ka jylla, Dr. BDR Tiwari, uba la ong ba ka jingpynlong ïa kane ka jingleit rung haman la ki iing ka la sdang naduh ka 30 tarik Jylliew ha kaba ki Booth Level Officer (BLO) ki leit man la ki ïing ban sam ïa ki form bad ban pynshisha ïa ki jingtip jong ki nongthep vote katkum ka jingbthah jong ka Election Commission of India.
U Dr. Tiwari u la ong ba ka jingthmu kaba kongsan jong ka Special Intensive Revision ka long ban pynthikna ba ym don uno uno u nongshong shnong uba dei hok ban thep vote uba shah iehnoh shabar. U ong ruh ba kane kan pyntikna ruh ba yn ym don kino kino kiba ym dei hok ban don kyrteng ha ka Electoral Roll.
Katkum ka jingïathuh jong u, la thung haduh 3,551 ngut ki Booth Level Officer ha ka jylla, bad uwei pa uwei u BLO un peit ha ka jingbun kaba long kumba 662 ngut ki nongthep vote. “Baroh ki BLO ki la dep shah hikai na ka bynta kane ka kam. Nalor kata, la thung ruh 60 ngut ki Electoral Registration Officer (ERO), 166 ngut ki Assistant Electoral Registration Officer (AERO) bad 410 ngut ki BLO Supervisor ban peitngor ïa ka jingpyntreikam,” u la ong.
U CEO u la pyntip ruh ba ka Meghalaya ka don mynta haduh 23,49,645 ngut ki nongthep vote.
Haba ïadei bad ka jingsam ïa ki form ha ki distrik bapher bapher, ka South West Garo Hills ka la wan hakhmat da kaba sam 20.49 persen ki form, bud sa ka North Garo Hills da 10.25 persen, South Garo Hills da 6.67 persen bad West Garo Hills da 6.5 persen. Ha East Khasi Hills, kaba don bun tam ki nongthep vote, la sam 28,006 tylli ki form, kaba long 4.43 persen haduh ka por 3 baje janmiet jong ka 01 tarik Naitung, u la ïathuh.
U CEO u la pyntip ba kane ka jingrung haman ki iing kan bteng haduh ka 29 tarik Naitung. Ha kane ka por, ki BLO kin sam ar tylli ki copy jong ka Enumeration Form bad kin shim biang ïa kawei kaba la pyndap, da kaba ai ruh ïa ka jingpynshisha ba la pdiang ïa ka.
U Dr. Tiwari u la ong ba ha kane ka bynta jong ka Enumeration ym donkam ban aiti ïa kino kino ki kot jingpynshisha (supporting document). U la ong ruh ba lada jia ba lap ba ka ïing ka khang, u BLO un buh ïa ka form bad un leit biang lai sien ban lum ïa ka.
Shuh shuh u CEO u la kyrpad ïa baroh ki nongthep vote ba kin ai ka jingïatreilang pura bad ki Booth Level Officer, kin pyndap hok ïa ki Enumeration Form bad kin aiti ïa ki hapoh ka por ba la buh. U la ong ba kane kan ïarap ban pynthikna ba ka Electoral Roll ka long kaba thikna, kaba pura bad kaba dang thymmai.