Baroh 90 klur ladep siew ka Sorkar jylla sha ki nongtrei ka MCCL shisnem shwa ka por : Bah Gavin Mylliem

Shillong, Naitung 01 : U MLA ka Sohra, Bah Gavin M. Mylliem, u la ong ba ka Sorkar Jylla ka la pyndep lut ïa ka jingsiew kaba kot 90 klur tyngka sha ki nongtrei jong ka Mawmluh Cherra Cement Limited (MCCL) da kaba pyllait ïa ka bynta kaba lai bad kaba khatduh jong ka watla ka por ba la buh ban pyndep ïa kane ka jingkular ka dang sah shisnem.
Haba kren sha ki lad pathai khubor ha ka Sngi Balang, u Bah Gavin u la ïathuh ba ka Sorkar ka la pyllait ïa ka bynta kaba khatduh ha ka taïew ba la dep, bad ka MCCL ka la ïohpdiang ïa ka pisa bad mynta ka dang pynkhreh ban sam ïa ka sha baroh ki nongtrei.
“Kadei ka jingshisha ba ka sorkar ka la pyllait noh ïa ka song kaba lai bad kaba khatduh jong ka pisa kaba dei na ka bynta ki nongtrei ha ka taiew ba khatduh bad na ka liang ka MCCL ruh ka la ïoh pdiang ïa kane ka pisa bad mynta ki dang pynbiang ban pyllait noh sha ki,” u la ong.
U la pynkynmaw ba dei ha u Kyllalyngkot 2025, ka Sorkar jylla ka la pynbna ïa ka skhim jingïarap kyrpang na ka bynta ki nongtrei MCCL hadien ka jingkhang ïa ka karkhana, da kaba kular ban siew 90 klur ha ki lai bynta bad hapoh ki lai tylli ki snem mangtyngka.
Katkum ka jingïathuh jong u, ka bynta kaba nyngkong kaba kot 36 klur (40 percent) la pyllait ha u Lber 2025, katba ka bynta kaba ar kaba kot 27 klur (30 percent) la pyllait ha u Naitung 2025. Mynta ka Sorkar ka la pyllait ruh ïa ka bynta kaba lai kaba kot 27 klur, kaba pyndep lut ïa ka jingïarap baroh.
U Bah Gavin u la ong ba watla ka Sorkar ka la kular ban pyndep ïa ka jingsiew hapoh lai tylli ki snem mangtyngka hynrei ka la lah ban pyndep ïa ka tang hapoh ar snem, kaba pyni ba ka la pyndep ïa la ka jingkular kham kloi ban ïa ka por kaba la buh.
U la ai khublei ïa ka Sorkar MDA ba la ïalam da u Myntri Rangbah namar ka la sngap ïa ka jingkyrpad jong ki nongtrei MCCL ban pyllait noh ïa ka pisa baroh kham kloi.
“Kane ka pyni shai ba ka Sorkar MDA ka dei ka Sorkar kaba ju pyndep ïa ki jingkular jong ka. Ngi sngewkmen ba ïa ka pisa baroh kaba dei hok ïa ki nongtrei la pyndep noh hashwa ka por ba la buh,” la ong u Bah Gavin.
U MLA u la pyntip ruh ba ha ka bynta kaba nyngkong jong une u snem la dep siew lut ïa baroh ki ram ba dang sah sha ki nongpynpoi mar jong ka MCCL kata da kaba kynthup naduh kiot kiba ju pynpoi dewïong dewbyrtha kiba la pynsah da ki snem.
U la ong ba ka jingpyllait ïa katei ka song pisa kan ïarap ïa ki nongtrei MCCL ban pyndonkam hok ïa ka pisa bad kan long ruh ka jingïarap ban pynneh ïa ka ïoh ka kot bad ka jingim jong ki bad ki longïing hadien ka jingkhang noh ïa ka karkhana.