Nongpoh, Nohprah 04: Ka seng Samla Umlyngkdait ha Ri-Bhoi District mynta ka sngi kala sdang ban plie pyrda ïaka jingrakhe dap 25 snem ka jingïaid lynti (Silver Jubilee) naduh bala seng ïaka ha u snem 1998 ban dang bteng ïaka jingshakri kum ki samla haka shnong bad ka imlang ka sahlang.
Ïa katei jingrakhe la wan ban plie pyrda da u Bah Mayral Born Syiem MLA ka Nongpoh kum u kongsan uba la kyntiew ruh ïaka lama jubili jong ka Seng Samla, haka jingdonlang u Bah NS Makdoh Rangbah Shnong kum u symbud kongsan, Bah G Shullai, Samla Bawan Marweiñ President Seng Samla, ki kmie ki kpa lem bad ki khun Samla jong ka shnong bad kiwei kiwei ki riew rangbah.
Haba kren ha katei ka sngi naka liang u Bah Mayral Born Syiem MLA ka Nongpoh u la ong ba ki Seng Samla ki don ka bynta ka ba khraw ban tei ïaka shnong ka thaw bad ka imlang ka sahlang kumba ki don shibun ki jabieng kiba dangkhie dang san haka jingmut jingpyrkhat, da ka ba kynmaw kyrpang ruh ïaki longdien kiba la suid la shor ïa katei ka Seng ban treikam bad shakri ha katei ka shnong ban long kum ki nonglam khmat, namar kam long kaba suk ban pyntyllun ïaki kam ki jam jong ka seng samla haduh 25 tylli ki snem haduh ba kan da ioh ban rakhe ïaka jubili rupa.
U la ong ruh ba kum ki Samla ki dei ban long kiba don ka jingkitkhlieh haka kam shnong kam thaw, ka imlang ka sahlang bad ki dei ban kynmaw ban im jingmut kaei kaba ki dei ban leh naka bynta ka shnong bad ka dong ka thaiñ.
U la kyntu ruh ïaki khun Samla ha katei ka sngi ba kim dei ban don kano kano ka jingpher jingmut ka jingbishni haka jingshakri jong ki ïaka shnong ka thaw hynrei ban don ka mynsiem jong ka jingïeid kum shipara khamtam ban ïatylli naka bynta ban dang pynkhlaiñ ïaka jingshakri jong ki khamtam ban long kum ki nongpeitngor ban rat diengkhong ïaki kam sniew kam smeh haka shnong ka thaw.
