Rakhe ka Ephphatha Society ïa ka sngi kyrpang kiba thut dkhotmet

Khliehriat nohprah 4: Ka Ephphatha Society ka dei ka kynhun treimon sngewbha kaba na East Jaintia Hills District kaba peit bad khmih kyrpang ïa kito ki briew kiba don jingduna ha ki dkhotmet, naduh u snem 2020 ba la seng ïa kane ka Society bad haduh mynta ka la leh shibun ki kam kiba radbah ha kaba kyrshan lem ïa ki briew kiba dei ki nongshong shnong ba kyrpang bad mynta ka sngi ruh ka la pynlong ïa ka prokram ba kyrpang jong kito kiba don jingduna ha ki dkhot met, kum ka jingrakhe ia ka International Day of Person with Disabilities 2023, ïa ka prokram la pynlong ha Sutnga Presbyterian School.
Ha kane ka sngi ka Society ka la ioh ban ai jingiarap sha kiba don jingduna ha ki dkhotmet da ki Wheel Chair, ki Supporting cane, ki jain kup thiah ba syiad bad ki syrnot sha kito ki khynnah kiba pass bha ha ki jingpule.
U Director jong ka Ephphatha Society, u Rev E.S.Supuh, u la pynpaw ka jingsngew khia halor ka jingsah dien ki briew kiba don jingduna ha ki dkhot met bad ong ba kane ka dei namar ba kum ka jaitbynriew, ngi im tang ha ka jingïa wad daw bad ka ju mih ruh ka jing pynrem ïa ka Kmie ba kha bad kynnoh ruh ba dei na ka daw ka pap ka sang ki kmie ki kpa, halor kane utei u Director jong ka Society u la pynshai ba kaba kum kane ka jinghikai kiba rim kala pynnoh mynsiem shi katdei eh ïa kiba don jingduna ha ki dkhot met bad ïa kiba ha ïing ha sem jong ki bad dei na kaba kum kane ka jinghikai ki ba rim ba ki ong ba ka dei ka daw ka pap ka sang, la pynlong ïa kiba bun ba kin lehraiñ ban pynpaw pyrthei ïa ki khun jong ki bad pynlong ïa ki ban buh rieh ïa kiba don jingduna ha ki kamra ïing haba don mano mano ba poi, kane ka jingleh kala pynduh mynsiem haduh katta katta ïa kiba don jing duna dkhot met bad kala pynlong ïa ki ba kin sah dien, hynrei la ong ba ka Ephpharha Society ka ïeng ban ïaleh pyrshah ïa kiba kum kine ki jinghikai kiba rim bad ialeh ban pynduh pynsam noh ïa kiba kum kine ki pyrkhat kiba bakla.
Da kaba pynshong nongrim na ka ktien u Blei kaba na ka gospel u ioanis ka lynnong 9, kaba u Jisu hi u la pynkhiah ïa uba matlah bad ong ruh ba ba kam dei satia ka pop jongno jongno hynrei ka dei kaei kaei ka ban pynpaw ïa ka burom ka jong u Blei ha kaba u Jisu u la pynkhiah bad pyn peit ïa u briew uba matla, u pastor Supuh u la ong ba kane ka jinglong ba kyrpang ha ki briew ka dei ba baroh kin iohi ïa ka burom ka jong u Blei lyngba ka jingim bad ka jinglah ba kyrpang jong ki, u la ong ruh ba ka Society ka ieng ruh halor ka nongrim ban pynkhuid noh ïa ki jingpyrkhat kiba rim bad kyrpad ïa ki paidbah ba kim ju dei ban pyrkhat bakla ia kane ka jinglong ba kyrpang jong ki briew.
U la pynpaw ka jingsngew nguh ïa u Blei ba kane ka Society mynta ka la lah ban buh ïa ki jaka ai jinghikai ha kaba suh jaiñ bad ha ka tem ka put kaba dei ka Music Class na ka bynta ki nongshong shnong ba kyrpang bad ka ophis treikam ka don ha Moowakhu kaba hap ha Dkhiah, East Jaiñtia Hills District, na kane ka shlem ai jinghikai la hikai ruh ban ia ieid iwei ïa iwei bad hapoh kane ka Society ki don ruh bun ki dkhot kiba iarap sngewbha ïa ka Society, kiba ju pynpaw tang ka jingieid bad ki ju pyn kmen pyn sngewbha ïa ki briew kiba kyrpang kiba ju wan shah hikai ha kane center jong ka Society.
U la iathuh ruh ba ki la don mynta haduh 60 ngut tam ki dkhot na kylleng ka East Jaiñtia kiba dei ki dkhot ha kane ka Society bad khmih lynti ba kat nang mih ki sngi kin sa nang bun ki ban rung sha kane ka society ban lah shuh shuh ban pynkylla dur ïa ka imlang ka sahlang.
Haba kren kum u kongsan, u MDC ka thaiñ, uba dei ruh u Tymmen basan jong ka Balang Presbyterian Sutnga, u bah Seiborlang Shadap, u la ai ka jingkhublei kitbok kitrwiang ïa ka Ephphatha Society ba kan nang lah ban ïaid shaphrang ha ka jingshakri ïa ka kam, u la iathuh ba na ka linag ka MLA ka thaiñ, ka kong Santa Mary Shylla bad kumjuh ruh na ka liang jong u kum u MDC ki long la kloi ban iarap bad kular ban ai ki jingiarap ïa ka Society kum ka jingkyrshan lang ïa ka Society.
U bah Alphose War, u ba don jingduna ha ki khmat, u la long kum u Symbud Kongsan, sngewtynnad ruh ba ubah Alphose War, u dei ruh uwei na ki nong khaïi synsar ha sor Shillong, wat hapdeng ki jingduna ha ka dkhot met u don sngewtynnad ban tip ba u don pat ka jinglah kaba kyrpang haba trei ïa ka kam die synsar bad u la ai jingkren ruh ha kane ka jingialang mynta ka sngi.
U symbud kongsan, u kyntu ïa ki kmie ki kpa kiba don ia ki khun ba don jingduna ha ki dkhot met ba kim dei ban lehraiñ, u pynshlur ïa ki ba ki dei bam mih shakhmat bad ban weng noh ïa ka jingsngew lehraiñ bad ka jingsngew duh mynsiem, u la pan ruh ka jingpynshai ha kaba iadei ba ka jingsiew ka sorkar sha ki briew kiba don jingduna ha ki dkhot met ba ka kong M.Chalam, kaba dei ka CDPO Khliehriat kaba don lang ha kane ka prokram ka la ai ki jingpynshai halor kane.
Ka muktiar, ka kong Naki Chalam, kaba ka pynshai shaphang ki hok ba ki nongshong shnong ba kyrpang ki dei ban ioh bad ki aiñ ban iada ïa ki.
Kiba ai jingkren ki kynthup ruh ka DCPO (ICDS) Khliehriat, ka kong Crisomy Pale, u Waheh Shong Sutnga, u bah E.Sutnga bad kiwei kiwei, la ioh ruh ka jingshad ba kyrpang na ki dkhort jong ka Ephphatha Society, ka jingrwai na u samla Iainehskhem Bareh, uba don jingduna ha ki khmat, sngewtynnad ban tip ba ia ka jingrwai kaba u la riwai ka dei ka jingrwai kaba u la thaw hi, ia ka proktam la pyniaid da ka kong Melody War.