Sdang ka Regional Principals Conference jong ka KVS Silchar Region ha Ri-Bhoi ban kyntiew ïa ka pule ka puthi

Nongpoh, Naitung 22: Kum ka thong ban dang pynjanai bad kyntiew ïa ka jingnang jingstad jong ki khynnah skul katkum ka jingkylla jong ka juk stad ba mynta, ka Kendriya Vidyalaya Sangathan (KVS), Regional Office Silchar, hynne ka sngi ka la plie paidbah ïa ka 13th Regional Principals’ Conference, kaba lai sngi, ha La Nicholas Resort, kaba don hajan ka pung Umiam ha Ri-Bhoi District.
Ïa kane ka jingïalang la wan ban plie paidbah da u Dr. Anurag Yadav, Deputy Commissioner, KVS Regional Office Silchar, ha ka jingdonlang u Satyaveer Singh, Assistant Commissioner, KVS RO Silchar, u K. Alung Khumba, Principal ka Kendriya Vidyalaya NEHU bad uba peit ïa ka Shillong Cluster, u M.B. Chettri, Principal ka Kendriya Vidyalaya Laitkor Peak, lem bad ki Principal bad ki nonghikai na ki Kendriya Vidyalaya bapher bapher.
Kane ka 13th Regional Principals’ Conference ka lum lang ïa 31 ngut ki Principal na ki skul Kendriya Vidyalaya kiba don ha Assam, Meghalaya, Mizoram bad Tripura. Ha kine ki lai sngi, ki Principal kin ïathir bad ïatai sani halor shibun ki mat kiba ïadei bad ka pule ka puthi, ka jingïaid beit ïaid ryntih jong ki skul bad ka jingpynbha ïa ka rukom ai jinghikai.
Haba ai jingkren, u Dr. Anurag Yadav u la ong ba ka jingïalang ka long ban bishar bñiah bad ïasam jingmut halor ki kam pynïaid skul, ka jinghikai bad ka jingnang jingstad jong ki khynnah, ka Bharat Scouts and Guides, ka jingïaid beit jong ki kam pisa tyngka, ka jingkyrshan ïa ka ktien Hindi bad ki ktien tynrai ka jylla, nalor ka jingïakren halor ki jingeh kiba ki skul ki ïakynduh ha ka ban ai ïa ka pule puthi kaba paka kaba ïahap bad ka juk ba mynta.
U la ong ruh ba kane ka Conference ka ai lad ïa ki Principal ban ïasam ïa ki buit treikam bad ki lad jingïarap ban dang pynjanai shuh shuh ïa ka pule ka puthi ha ki Kendriya Vidyalaya.