Shillong, Lber 18 : Ka Rangdajied United FC ka la sdang da ka jingjop ha ka lympung ïalehkai jong ka Shillong Premier League kaba sdang hynne ka sngi ha madan SSA Stadium, Polo Shillong.
Kane ka jingjop jong ka Rangdajied kadei hadien ba ka la lah ban pynliem noh ïa ka kynhun ba dang rung thymmai ka Nongthymmai SC da 1-0 kol ha ka jingïakhun kaba itynnad bha. Ïa ka kol jop na bynta ka kynhun la ïoh ban thep da u Ksankupar Khongmalai ha ka minit kaba 61 jong ka kylla miet.
Ka Nongthymmai ka la ïoh rung sha ka SPL hadien ba ka la wan ba ar ha ka First Division ha u 2022. Kane kadei ka samoi kaba nyngkong ïa ki ha katei ka lympung ïalehkai hynrei watla ki la ïalehkai pynban ki hap ban leit phai iing khlem kamai point.
Shwa jong kane ka kol, dei u Andyson Lapang ka Nongthymmai u ba la ïoh ïa ka kabu ksiar ban pynkhih jar tang ha ka minit kaba 11 hynrei ïa katei ka bol la ïoh ban ïada noh da u Banshanskhem Khar-syntiew ha phyllaw kol jong ka Rangdajied.
U rangïalehkai shakhmat ka Rangdajied FC u Bansanbha Khongsdam u la ïoh lad katto katne sien ban pynsyier ïa ki rangap dien ka Nongthymmai ha ka kylla step hynrei ym shym la ïoh lad ba ksam sha kol. Hynrei la katta ruh u la jan ïoh ban thep kol ha ka minit kaba 35 tangba ka jingstet jong u rangap kol ka Nongthymmai, u Senapati la pynpulom noh ïa katei ka jingthmu.
Na ka liang ka Nongthymmai watla ki lah ban kyrshan tyngeh ha ka kylla step khlem shah thep kol hynrei ka rukom ïalehkai ha ka kylla miet ka la kylla watla u Senapati bad ki rangap dien ki la kyrshan tyngeh. Ym lah ruh ban len ba ki rangïalehkai shakhmat ka Nongthymmai kynthup naduh u Andyson bad u Robi Hansda ki la ïoh lang ka kabu ban pynthut ïa ki rangap dien ka Rangdajied tangba kim ïoh pat ïa ka lad ban pynkhih jar.
Ka jingïakhun ha kane ka sngi Ba-ar pat kan long hapdeng ka Sawmer pyrshah ïa ka Nangkiew Irat SC ha ka por 3:00 baje janmiet.
