Sa shisien pat ka ri India ka la thnam da ka jingpynbna ïa ki tarik na ka bynta ka General Election na ka bynta ban jied ïa ki nongmihkhmats ha Lok Sabha. Kane kadei ka elekshon ka ban rai na ka bynta ka sorkar kaban synshar ïa ka ri India ha kine ki san snem ban wan, kata naduh u 2024 haduh 2029.
U Chief Election Commissioner ka Election Commission of India u Rajiv Kumar u la pynbna ba ka election ha ka ri sha Lok Sabha na bynta ka samoi ba 18 ka ïingdorbar ne 18th term ka Lok Sabha kaban long ha ki 7 tylli ki phase ha kaba ka elekshon ha ka jylla kan thep vote ha ka phase ba nynkong kata ha ka 19 tarik Iaiong 2024.
Ka jingthep vote ha ka Second phase kan dei 26 ïaong, ka Third phase 7 Jymmang, 4 phase 13 Jymmang, 5 phase 20 Jymmang, 6 phase 25 Jymmang bad ka 7 phase kan dei ha ka 1 Jylliew bad ka tarik ban niew vote ia la elekshon MP kan dei ha ka 4 tarik u Jylliew 2024.
Haba kren sha ki lad pathai khubor u CEC u la iathuh ba kin don 96.8 klur ngut ki paidbah kiba la don la hok ban jied ia ki MP bad na kine ki don 49.7 klur ki shynrang bad 47.1 klur ki kynthei. U la iathuh ruh na napdeng kine ki don 19.74 klur ki nonthep vote kiba hapdeng ka rta 21 haduh 29 snem.
Ha kane ka sngi u CEC u la pynbna ruh ia ka election sha ki iing dorbar thaw aiñ ki jylla ba khynthup ia ka Arunachal Pradesh, Sikkim, Odisha, Andra Pradesh kiban long lang ha ka juh ka por bad ka election MP.
Lada phai ka jylla Meghalaya u Chief Electoral Officer jong ka Jylla u DR. BDR Tiwari ha ka 16 tarik u Lber, 2024 u la pyntip ba ki nongthep vote ha Meghalaya haduh une u snem 2024 ki don 22, 17,100 lak ngut ban rai ïa ka lawei san snem jong ki kyrtong na Shillong bad na Tura ha ka eleshon Lok Sabha ka ban sa long ha ka 19 tarik Ïaiong, 2024.
Ki nongthep vote shynrang ki don 10,94, 947 ngut, ki kynthei ki don 11,22,150 ngut bad 3 ngut ki Third Gender. Ha ka jingïalang bad ki lad pathai khubor tang hapoh khyndiat kynta ba ka Election Commision of India ka la pynbna ïa ka tarik ban pynlong ïa ka elekshon Lok Sabha, u Tiwari u la ong, ka jingkiew ki nongthep vote na u snem 2023 haduh kaba sdang jong ki ar bnai jong u snem 2024 ka long 55, 971 ngut.
Ki nongthep vote ba dang shu pynrung kyrteng thymmai ha ka Electoral Roll, 2024 ki long, 56,909 ngut, ki Service Voter ki don 3835 ngut, ki nongthep vote ba duna dkhotmet ki don 11179 ngut, ki nongthep vote ba la kynjoh 80 snem ka rta shaneng ki don 23, 793 ngut bad 5 ngut ki Non Resident Indian (NRI).
Ki Polling Station ki don 3512 tylli, ba kynthup 326 tylli ha ki jaka sor bad 3186 tylli sha ki jaka nongkyndong.
Haba ai jingkheiñ ïa ka jingpoi ki paidbah kiba thep vote ha Shillong bad Tura ha ki elekshon Lok Sabha ba la long ha u snem 2014 ki long 63.28 percent ha Shillong bad 79.14 ha Tura. Ha u snem 2019, ki nongthep ki long 65.48 percent ha Shillong bad 81.38 percent ha Tura. U CEO u la ïathuh ruh ba ka tnat Election ka la ïakren bad ki bor shipai BSF ba kin peitngor ïa ka khappud katba ka ri ka dang pynkhreh ïa ka elekshon.
Ha Meghalaya hi ka elekshon MP kam dei ka elekshon kaba shongshit kumba long ha ka elekshon MLA ne MDC ruh. Kadei ka elekshon kaba jar jar bad kaba bobarabor hi ka jingwan ki nongthep vote ruh ka duna bha. Hynrei mynta u snem ka shu i shongshit da ka jingleit ka Seng VPP kylleng kylleng ki jaka jong ka Ri Khasi bad Jaiñtia na ka bynta ban pynshai ïa ki nongrim bad ki mat treikam ka Seng kaba la sdang naduh ba ladep ka elekshon MLA jong u snem 2023. Hynrei namar ba ka Party ka la pynbna lypa ïa u Kyrtong MP da kaba pynieng ïa u Dr. Ricky AJ Syngkon, kane ka jingleit ka la kylla long ruh syndon ka jingïalap na ka bynta ka elekshon MP. Katba nang jan ki sngi sha ka jingpynbna ia ka elekshon MP, ka jingialap ruh ka la nang shongshit kat haduh kaba la pynlong ruh ia kiwei pat ki Party ban ther beit ia ka Party VPP bad bun ki la klet noh ïa ki mat ne ki ishu kiba kidei ban kren.
Te ka por ka sah sha shi bnai na ka bynta ki artylli ki Parliamentary Constituency, kata ka Shillong bad ka Tura na ka bynta ka jingpynshai bad ka jingkhroh briew. Te kan shong ha ki nongialam bad ki nongtrei jong baroh ki Party na ka bynta ban pynurlong ia ki jingthmu jong ki.
