Sdang ka Meghalaya da ka nam jop ha ka Women’s U-19 T20 Trophy

Shillong, Risaw 01 : Ka kynhun ki thei ïalehkai kriket ka Meghalaya ki la sdang ka jingïaid lynti jong ka da ka nam jop ha ka BCCI Women’s U-19 T20 Trophy da kaba pynliem da hynñiew wicket pyrshah ïa ka Goa ha ka jingïalehkai ha ka sngi Saitjaiñ ha Hyderabad.
Katei ka nam jop ka la wan ruh lyngba ki jingkamai ron lang da 78 ron hapdeng ka Ankita Sharma bad Monica Lyngdoh Phawa.
Haba beh ïa ka thong kaba 86 ron ha ka sngi sdang jong katei ka tournament, ka jingkamai ron jong ka Meghalaya ka long suki bha ha kaba ka la duh noh ar tylli ki wicket ha ka jingkamai kaba tang lai ron, hynrei ka Phawa kaba la lah ban kamai 25 ron bad ka Sharma ka kamai 46 ron khlem shah pynhap wicket ki la lah ban pynïoh mynsiem ïa la ka jong ka kynhun.
Ka jingïakamai ron hapdeng kitei ki arngut ka long kaba biang bha ha kaba ka Sharma ka khlem pynlehnoh ei ïa ka shi ron ha ka shi over bad ka la khyrwit san tylli ki saw ron (four) katba ka Phawa, kaba la tied sdang, ka la kamai bun ron. Ka Meghalaya ka jan kynjoh sha ka thong hadien ba ka Phawa ka la hap wicket noh hynrei ka Meghalaya ka la pyndep bad kynjoh ïa katei ka ron tang ha ki 18.2 over.
Shwa ba ka Meghalaya kan beh ïa ka ron, ka Goa kaba la jop ïa ka jingkynting pisa ka la kam ban tied nyngkong bad kamai 85/2 ha baroh ki 20 over.
Ka Suriti Kumari Ray ka la khur ar wicket bad ai kamai 17 ron ha ki saw over ba ka la ïoh ban kawang bol. Baroh kitei ki ar wicket ba ka Kumari ka la ïoh kadei lyngba ka jingïoh kem (catch out) da ka Sara Daffica Kharbani bad ka Sistilin Ryntathiang. Ka Meghalaya kan mih madan biang mynta ka sngi U Blei ban ïakhun pyrshah ïa ka Vidarbha, kaba la jop da kaba pynliem ïa ka Sikkin da khyndai wicket ha ka jingïalehkai kaba nyngkong ha kane kajuh ka sngi (sngi Saitjaiñ).