Sdang ka Lynti Jam Football Center Meghalaya ïaka‘Sunfeast Cup 2023’
Haduh 50 tylli ki kynhun kiba la wan ban shimbynta.
Nongpoh, Risaw 26: Ka Lynti Jam Football Center, Meghalaya ryngkat ka jingïatreilang bad ka SPT Sports Bangalore haka sien ba 7 kala ïoh ban sdang biang ïaka lympung ïalehkai phutbol bala tip kum ka Sunfeast Cup 2023, Meghalaya Master naka bynta ki heprit shynrang haka kyrdan U-13 bad ruh ha ka kyrdan U-16 kynthei bad shynrang, ïa katei ka lympung la ïoh ban sdang hynne ka Sngi Palei ha Madan ïalehkai jong ka shnong Mawleiñ Mawkhan.
Ha kane ka lympung haduh 50 tylli ki kynhun na kylleng ka jylla Meghalaya kila wan ban shimbynta bad kane ka lympung kan long ruh kum ka rynsan bad ka kabu ksiar ïaki heprit kynthei bad shynrang kiba donsap ba kin ïohlad ruh ban kiew shaphrang haka jingïalehkai phutbol namar ki kynhun ba jop kin ïoh ruh ban mihkhmat ïaka jylla haka jingïakop jong ki jylla ka thaiñ Shatei Lam mihngi jong ka Ri.
Ïa katei ka lympung Sunfeast Cup 2023 la wan ban plie paidbah da u Bah Jeffery Warlarpih Coach ka Meghalaya kum u kongsan haka jingdonlang u Bah Sumarlang Swer President ka Lynti Jam Football Center, Meghalaya Bah Teibor Makri Rangbah Shnong Mawleiñ Mawkhan, Bah Manchester Rani, Chairman Mawleiñ Mawkhan Dorbar Pyllun bad kiwei kiwei ki riew rangbah.
Haba phai sha katei ka jingïalehkai ba nyngkong ha katei ka sngi haka kyrdan U-16 kala long hapdeng ka Shillong Soccer Scout pyrshah ïaka Umbir ha kaba ka Umbir ka la pynliem noh ïaka Shillong Soccer scout da 1-0 kol.
Katba ha ka jingïalehkai ba ar kala long hapdeng ka PFR Academy Shillong pyrshah ïaka Nartap Grass Root Nongpoh haka kyrdan U-13 ki shynrang ha kaba ka PFR Academy Shillong kala lah ban pynliem noh ïaka Nartap da 5-0 kol ban rah ïaka nam jop ba nyngkong jong katei ka lympung.