Nongpoh, K’lyngkot 28: Kumba ju long man la u snem ba pynneh pynsah ïa la ka riti ka dustur bad ïa ki jinglehniam tynrai hapoh ka Raid Marwet, ka Raid Marwet ryngkat ka jingïatrei lang bad ka Marwet Sohjer Committee mynta ka sngi ki la plie pyrda noh ïa kawei na ka jingleh niam tynrai ba la tip kum ka Shad Sohjer ba hap ha ka Raid Marwet ha ka Hima Mylliem Syiemship.
Ïa kane ka Lehniam Sohjer la plie paidbah ha ka sngi Baar da u Bimal Saikia Deputy Chairman ka Mineral development corporation Limited, Meghalaya kum u kongsan bad la sakhi lang ruh da ka jingdon lang u Syiem ka Raid Marwet u Paiem Ken Syiem, ki longsan mansan ka Raid bad ki khun ki hajar jong ka Raid Marwet.
La sdang ruh ïa kane ka lehniam Sohjer da ki jingïakop bapher bapher kum ka jingïakop dro dur, ka jingïakop shad, ka jingïakop rwai bad kiwei kiwei ki prokram, kaba long shi bynta ban pynphuh pynphieng ïa kane ka lehniam Sohjer.
Haba kren ha kane ka sngi, u Bimal Saikia, Deputy Chairman ka Mineral Development Corporation Limited, Meghalaya, u la ai jingïaroh ïa ka Raid Marwet bad ruh ïa ki khun ki hajar, kiba la shim khia ban pynlong ïa kane ka lehniam Shad Sohjer, kaba long shi bynta ban pynneh pynsah ïa ka riti ka dustur. Ha kajuh ka por u la kyntu ruh ïa ki, ba kin dang shim khia ban pynneh ïa la ki riti ki dustur khnang ban skhem ka riti ka dustur bad ruh ka jinglong tynrai ka jaid bynriew hapoh kane ka Raid Marwet.
U Syiem ka Raid Marwet, u Paiem Ken Syiem u la pynpaw ïa ka jingkmen ba la lah ban plie paidbah noh mynta ka sngi ïa kane ka lehniam Sohjer bad u la pyntip ruh ba mynta ka sngi ki don tang ki jingïakop bapher bapher bad lashai ka sngi kan don ka jinglehniam kyrpang kiba dei katkum ka riti ka dustur ka Raid Marwet.
