Shillong, Lber 25: Na ka daw jong ka jingpyrkhing hadien ba la pynbna ïa ka Model Code of Conduct na ka bynta ka jingpynlong ïa ki ilekshon sha ka Lok Sabha na ka liang jong kiba khmih bad nongpeit pyrman kiba dei ki briew jong ka tnat ilekshon jong ka sorkar jylla ki la pynlong ïa ka jingap ktem ha kylleng ki jaka ban talasi ïa ki nongleit nongwan ban pynthikna ba ki briew kim dei ban rah pisa palat ïa kaba la buh kyndon da ka tnat Election of India kaba la pynbna dangshen.
Ha kaba ïadei bad kane ki briew jong ka tnat ilekshon jong ka sorkar Meghalaya ki la pynlong ïa ka jingap ktem hakhmat ka ophis jong Deputy Commissioner jong ka East Khasi Hills District ban pynthikna ba kan ym don ka jingrah pisa palat kumba la bthah da ka tnat ECI.
Na ka liang jong ka tnat ilekshon jong ka jylla Meghalaya ka la pyntreikam ïa baroh ki kyndon kiba la bthah ban pynthikna ba kane ka ilekshon kan ïaid beit ïaid ryntih hapoh ka jylla Meghalaya baroh kawei bad ba kan long kaba suk kaba saiñ bad kaba shong shngaiñ.
Ha ka sngi nyngkong la ïohi ba kawei ka kynhun Static Surveillance Team ka la ïeng hajan ka ophis u Deputy Commissioner ha kane ka General Election sha ka ïing dorbar ka Ri India ka Lok Sabha 2024 ka ban sa sdang shen.
