U Blei uba stad ba naduh u 2018 haduh 2023 ba synshar ka NPP kam don ka jingkhang mane Blei: Prestone Tynsong

Shillong, Lber, 25: U Symbud Myntri Rangbah ka jylla Bah Prestone Tynsong uba dei ruh u State President jong ka National Peoples Party (NPP) u la buh jingkylli ïa kito kiba ju kynthoh da kaba ong, “Hato naduh ba ka National Peoples Party ka la bat ïa u la kam synshar hapoh ka jylla Meghalaya naduh u snem 2018 haduh mynta u snem 2024 ka la ju don ne em ka jingpynthud bad ka jingkhang ban mane Blei laitluid hapoh ka Jylla Meghalaya.”
Ha ka jingïakren bad ki lad pathai khubor ha ka Lah Sngi u Blei, u Bah Prestone u la ong ruh ba ka nongrim jong ka NPP ka long ban ïada ïa ki ritpaid bad ban pynneh pynsah ïa ka riti ka dustur, ka jingngeit bad ka niam ka rukom.
Kane ka jingpynshai jong u Bah Prestone ka long hadien ba ka la mih ka jingkynnoh ba ka BJP bad ka NPP ki dei hi kajuh ka party tang hadien ar sngi eiei ba ka High Command jong ka BJP ka la shim ïa ka rai ban ym pynïeng kyrtong satia ha Meghalaya hynrei ban kyrshan ïa ki kyrtong ba la pynïeng da ka NPP ba kynthup ïa ka Dr. Ampareen Lyngdoh ka ban ïakhun na Shillong Parliamentary Seat bad ka Agatha Sangma na Tura Parliamentary Seat.
“Ka jingkynnoh ba ka BJP ka dei ka NPP bad ka NPP ka dei hi ka BJP kam dei shuh kaba dang mynta hynrei ka dei kaba la jia mynta la bun tylli ki snem. Naduh u snem 2018 ha ka por ba ka NPP ka la sdang ban khie rasong bun bah ki jingpyntieng pynsmiej ba wat thep ïa ka NPP namarba ka NPP ka dei hi ka BJP bad ynda ki la jop bad khamtam ynda ki ïoh ban synshar ïa ka Sorkar kin khang wat ïa ki ingmane ruh bad kin ym shah wat ban pynlong ïa ka jingmane Blei,” la kynthoh u Bah Prestone.
“Kata ka dei ka jingkynnoh ha kato ka por. Hynrei lada phi phai kaei kaei kaba jia, u Blei uba stad, namar hadien ba ngi la ïoh ban synshar naduh u 2018 haduh u 2023 nga kwah ban kylli ïa kito ki nongkynnoh hato don mo ka por ba hapoh ka jingïalam ka NPP ïa ka Sorkar ka don mo kata ka jingpyrkhing, ka jingkhang, ka jingpynwit, ka jingpynthud ïa ka jingmane Blei,” la buh jingkylli u State President ka NPP.
“Ngi ïeng ha ka nongrim ba ngin ïada ïa ki ritpaid bad ngi kwah ban pynneh pynsah ïa la ka jong ka riti ka dustur, ka jingngeit bad ka niam ka rukom. Mynta ka kynti ka jingkynthoh jong ki babun balang ka long ba ka NPP ka mut ka BJP, ka BJP ka mut ka NPP hana namarba ka High Command jong ka BJP mynshi sngi ka la rai ban kyrshan ïa ka NPP ha Shillong bad ha Tura Parliamentary Constituency,” u la ong.
“Ngi pdiang sngewbha ïa ka jingkyrshan ïa ki kyrtong ka NPP ka bym don ruh ka jingbuh kyndon hangno hangno ruh. Ngi lyngngoh hapoh ka Jylla namarba ma ki (kyrtong) ruh ki la pan tiket na Shillong bad na Tura bad ngi nang pyrkhat ba la kumno kumno ruh ka BJP kan ïaleh beit,” ong u Bah Prestone bad bynrap, “ïa kata ngi ieh ha ka jingstad jong ki (BJP) lehse ka jingpyrkhat jong ka High Command (ka BJP) ka long kaba bha tam namarba ka NPP ka ïatreilang hapoh ka National Democratic Alliance (ba la ïalam da ka BJP).
“Ha North East, lada phi ong ha Manipur ngi kyrshan ïa ka MNF bad ha Nagaland ngi kyrshan ïa ka NDPP ba ïalam da u Neiphu Rio namarba ki don lang hapoh ka NDA,” la pynshai u Bah Prestone.
“Ngim dei ban sngewthuh bakla haba ngi ai jingkyrshan ba ka riti treikam jong ka party ba ngin weng noh ïa ka, em. Kane ka nongrim jong ngi, kane ka tien phira jong ngi, ki agenda jong ka party NPP ka long ban ïada, ban pynneh, ban pynsah ïa ka riti dustur, ïa ka niam ka rukom, naduh ka jingngeit bad ka jingmane Blei ki ritpaid ym tang ha Meghalaya hynrei ha baroh kawei ka ri India,” la bynrap shuh shuh u Bah Prestone.
U ong ruh ba kum kine ki jingkynnoh ki ju jia bha ha ki por ilekshon. “Nga kyrpad ïa ki paidbah nongthep vote ba ki dei ban pynshong nongrim bad kim dei ban shu ngeit ïa kum kine ki jait jingkynnoh kiba mih tang ha ki por ilekshon,” la kyrpad u State President ka NPP.