Shillong, Rymphang 26: Hadien ka jingap ba palat shi taiew ïa ka jingshimkhia jong ki bor halor ka jingshah set tulop, ki nongtrei ka Garo Hills Autonomous District Council (GHADC) ki la mih da ki spah ngut ban pynlong ïa ka jingïakhih ba lai sngi ka ba la sdang mynta ka Lah Sngi U Blei.
Hapoh ka lama jong ka Non Gazetted Employees Association, ki nongtrei ka GHADC kila ïalum ha madan Tura Government College ha Teteng A’ja ban sdang ïa ka jingïakhih.
Ha ryngkat ki Banners bad Placards, ki nongtrei ki la dawa ban pyllait noh ïaka tulop jong baroh 32 bnai bad naka liang ki nongïalam ka NGEA kila pynpaw ba la bun bun sien ki la ju pynsngew sha ka Executive Committee (EC) jongka GHADC halor ka tulop hynrei haduh mynta ki khlem pat ïoh kano kano ka jingkular kaba la pynlong ïa ki ban sdang noh daka jingïakhih naduh mynta ka sngi.
U President ka NGEA u Brithin M Sangma haba kren sha ki para nongïakhih ula ong ba ki long kiba la kloi ban ïakren lada ki shah khot ha ki bor ka GHADC naka bynta ban ïakren halor ka tulop.
Ki nongtrei kila sdang ïa ka jingïakhih naduh ka por 10 baje mynstep haduh 4 baje janmiet. Kane ka jingïakhih ki nongtrei kan ktah bad ka pyndkoh ïa ki kam ki jam hapoh ka district council bad mynta ka sngi la sakhi ka jingthylli ki kamram treikam bad ki miej treikam ka ban ktah ïaka ïoh ka kot jong ka Council.
Naka liang ki nongtrei ka GHADC ki la pynlong ka jingïakhih hapoh ka madan jong ka College namar ki bor district ki la mana ban pynlong ka jingïakhih ha phyllaw treikam ka council.
