Mynjur ka Kynhun Myntri ïa ka Meghalaya Power Policy 2024 ban pynkhlain pynmih bording

Shillong, Rymphang 26 : Ka Sorkar Jylla mynta ka Lah Sngi U Blei ka la ai jingmynjur ïa ka draft Meghalaya Power Policy 2024, ka ban plie lynti ïa ka jingpyntrei ïa ki project pynmih bording lyngba ka hydro, thermal, pumped storage, solar, wind bad kiwei kiwei, ha ka lynti kaba janai bha.
ïa kane la pyntip da u Myntri ka Tnad Bording u Abu Taher Mondal hadien ka jingïalang jong ka kynhun Myntri bad ong “Ngi la ïakren sani bha ïa kane ka Policy ba thymmai bad ka Kynhun Myntri ka la ai jingmynjur ïa ka”.
Ula pyntip ba ka power policy kaba rim, ka dei kaba la shna ha u 2010. “Khatsaw snem ka la ïaid ka por bad kam shym la don ki jingkylla kiba heh ha ka jingpynmih bording..kumta ngi donkam ïa ka power policy ba thymmai” ula bynrap.
Kane ka policy barim kam shym la kynthup satia ïa ka bynta kaba ïadei bad ka pumped storage project, ïa kaba la kynthup lang mynta.
Ka kynhun Myntri ka la rai ruh ban pynkylla ïa ki kyndon jong ka kam pynmih bording na ka sngi (solar energy) haba phai sha ka kam ban thied ïa ki tiar ki tar ban lah pynmih bording na ka sngi.
U Myntri ula ong ba kane ka Policy thymmai kan pynshlur ruh ïa ki nongsengkam ba kin wan sha ka Jylla khnang ba kin lah ban pyntrei ïa ki project pynmih bording ha Jylla.
Ula pyntip ba baroh ki kam pynmih bording kila shah kynthup lang ha kane ka Power Policy ba thymmai. “Kane ka policy ka dei ka jingbtin lynti ba kumno yn sdang ïa ki project pynmih bording” ula ong.
U Myntri ula ong ba ka jingthmu ba hakhmat eh jong ka Policy ka long ban wanrah ïa ki Pumpeed Hydro Power Project hapoh ka Jylla, ban khring ïa ki nongkynshew kam shimet, ban pynmih khajna ïa ka Sorkar bad ban kyntiew ïa ka ïoh ka kot jong ka Jylla.
Nalor kane, ula ong ba ka Policy ka thmu ruh ban wanrah ïa ka thermal power project ba lah ban pynmih bording haduh 250 MW.