Yn ïarap ki Bank & ki PO ïa ka ECI ban ai jingtip sha ki nongthep vote shuwa ka elekshon Lok Sabha
Shillong, Rymphang 26 : Ha ka sienjam kaba nyngkong kaba kum kane, ka Election Commission of India (ECI) mynta ka sngi ka la ïasoi ïa ka Memorandum of Understanding (MoU) bad artylli ki kynhun, ka Indian Banks’ Association (IBA) bad ka Department of Posts (DoP) ban kyntiew ka jingai jingtip sha ki nongthep vote jong ka bad ki sienjam ai jinghikai hashuwa ka elekshon Lok Sabha ban wan mynta u snem. Kane ka sienjam ka dei ka jingbteng ïa ki sienjam jong ka ECI ban kyntiew ka jingai jingtip shaphang ka elekshon ha ka ri.
Kum ban shu kdew, ka ECI dang shen ka la ïasoi MoU bad ka Tnat Pule Puthi jong ka sorkar pdeng ban pynïasoh ïa ka jingnang jingtip shaphang ka elekshon bad ka pule puthi ha ki skul bad ki kolej. La ïasoi ïa ka MoU mynta ka sngi ha ka jingdonlang u Chief Election Commissioner Rajiv Kumar bad u Election Commissioner Arun Goel. U Vineet Pandey Secretary, Department of Posts, u Sunil Mehta, Chief Executive, IBA bad kiwei kiwei ki heh ophisar na ka Tnat Posts, IBA bad ECI ki la ïadonlang ha kane ka jingïalang.
Ka MoU bad ka IBA & DoP
Kum shi bynta ka MoU, ka IBA & DoP lem bad ki dkhot jong ka bad ki kynhun kiba ïasoh bad ka kin ai jingkyrshan ban kyntiew ïa ka jingai jingtip ïa ki nongthep vote lyngba ki rynsan ba ïar jong ki khlem da shim jingsiew ei ei, da kaba wanrah ïa ki prokram bapher bapher ban pynkup bor ïa ki nongshong shnong da ka jingtip shaphang ka hok thep vote jong ki, ki kam bad ki sienjam ban kyntiew kyrteng bad thep vote.
Ki Mat ba kongsan jong ka MoU ki kynthup:
Ki dkhot bad ki kynhun ba ïasoh kin buh ïa ki khubor ai jinghikai ha ki website jong ki,kiba bthah ïa ki briew ban ïoh jingtip shuh shuh shaphang ka kam jied nongmihkhmat.
Ka bynta jong ka jingai jingtip ïa ki nongthep vote kan long ka jingpynsaphriang lyngba ki lad bapher bapher kum ka social media bad ki rynsan jong ki kynhun ba ïatrei lang, da kaba pynthikna ka jingïoh jingtip hapdeng kito kiba don bynta bad ki paidbah.
Yn buh ïa ki khubor ai jingtip ïa ki nongthep vote ha ka dur jong ki poster, flex, bad ki hoarding ha ki phyllaw jong ka ophis ha ki jaka ba kongsan, ban poi sha ki briew .
Baroh ki kynhun ba long dkhot hapoh ka IBA & DoP kin plie ïa ka Voter Awareness Fora ban kynthup ïa ki nongtrei bad ki briew ha ki jingïamir jingmut bad ki sienjam ba ïadei bad ka jingai jingtip ïa ki nongthep vote.
Ka jingai jingtip shaphang ka jingai jinghikai halor ka SVEEP ha ki prokram ai jingtip jong ki nongtrei jong ka IBA & DoP.
Ka Tnat Posts kan buh ïa ka stamp kaba kyrpang (ba don ki khubor ba ai jinghikai ïa ki nongthep vote) ha ki mar ba phah lyngba ki post office.
Hapdeng ka jingjop ka jingpynïaid bad pynlong elekshon ka Election Commission ha kine ki snem ha ka rukom kaba shai bad kaba ïaid beit ïaid ryntih ryngkat bad ka jingkiew ka jingïashim bynta jong ki nongthep vote, ka don ruh ka jingsngewkhia ba kumba 30 klur ki nongthep vote (na ka 91 klur), kim shym la wan ban thep vote ha ki elekshon sha ka ïing dorbar thawaiñ Lok Sabha ha u snem 2019. Ka percentage jong ka jingdon ki nongthep vote ka long 67.4%, kaba la Commission ka la shim kum ka thong ban kyntiew ïa ka.
Kane ka jingïatreilang bad ka IBA bad ka Department of Posts, ka pyni ïa ka sienjam ba kongsan sha ka jingpynkhlaiñ ïa ka synshar paidbah da kaba pynkup bor ïa ki nongshong shnong bad ka jingai jingtip shaphang ki hok thep vote jong ki bad ki jingkitkhlieh. Lyngba ki sienjam ba tyngeh, baroh ar ki kynhun ki kut jingmut ban kyntiew ïa ka jinglong kaba don jingtip bad ka jingïashim bynta shitrhem ha ki kam jied nongmihkhmat.
Ka Nongrim : ïa ka Indian Banks Association (IBA), la seng ha ka 26 tarik Nailur, 1946, ha kaba la sdang da 22 ngut ki dkhot bad mynta ka don ka rynsan kaba khlaiñ kaba kynthup 247 ngut ki dkhot ha kylleng ka ri. Ki Public sector bank ki long kiba hakhmat da kaba don 90,000 tam ki tnat bad 1.36 lak ki ATM bud sa 42,000 tam ki tnat jong ki Private Sector Bank bad 79,000 tam ki ATM. Ki Regional Rural Bank ki noh synniang 22,400 tam ki tnat, katba ki Small Finance & Payment Bank ki don kumba 7000 tylli ki tnat bad 3000 tam ki ATM. Ki Foreign Bank ki don 840 tylli ki tnat bad 1,158 tylli ki ATM, bad ki Local Area Bank ki don 81 tylli ki tnat. Ka jingdon ki tnat baroh kalong 1.63 lak tam bad 2.19 lak tam ki ATM ha kylleng ka ri.
Palat 150 snem, ka Department of Posts (DoP) ka la long u budlum jong ki lad ïakren jong ka ri bad ka don ka bynta ba kongsan ha ka jingkiew ka imlang sahlang bad ka ïoh ka kot jong ka ri. Palat 1,55,000 tylli ki post office, ka DoP ka don ka rynsan kaba heh tam ha ka pyrthei kaba ïadei bad ki kam post office.