Sdang ka AICEeCC ha NERIE Umiam, angnud ban pynïar jingtip sha ki khynnah katkum ka juk stad mynta

Nongpoh, Lber 15: Ka All India Children’s Educational e-Content Competition (AICEeCC) kaba dei ka jingïakop thoh katkum ka juk stad ba mynta naka bynta ban dang pynïar shuh shuh ïakajingtip sha ki khynnah bad ki samla pule kala sdang mynta ka sngi ha North East Regional Institute of Education (NERIE) Umiam bad ïa katei ka jingïakop la pynlong da ka Central Institute of Educational Technology (CIET), NCERT, Delhi.
Ïa katei ka jingïakop ba 2 sngi lynter la wan ban plie paidbah u Prof. PS Shukla Vice Chancellor ka NEHU kum u kongsan, haka jingdonlang u Prof. Amarendra Behara Jt. Director ka CIET, NCERT, Prof. F.G Dkhar Principal ka NERIE bad kiwei kiwei ki khraw pyrkhat, ki nongwad bñiah, ki nonghikai na kylleng ki jaka jong ka ri.
Haba kren maitphang ha katei ka sngi u Prof. Amarendra Behara Jt. Director ka CIET, NCERT, u la ong ba ka thong jong katei ka jingïakop ka long ban nang pynïar ïaka jingnang ka jingtip bad ka jinghikai lyngba ka juk stad kaba mynta bala shim bynta da ki khynnah, ki nonghikai, ki khraw pyrkhat ban wanrah ki jingkylla haka liang ka pule ka puthi.
U Prof. PS Shukla kum u kongsan haba kren ha katei ka sngi u la pynpaw ba ki nonghikai ki dei ki nongtei ïaka ri bad kane ka rukom pynïar ïaka jingnang jingtip lyngba ki rukom pyrkhat bapher bapher kan wanrah ka jingkylla haka liang ka pule ka puthi bad khamtam ka pynkylla ïaka pyrkhat pyrdaiñ bad ka jingstad jong ki samla pule ha kane ka juk ba mynta ba ki samla pule ki lah ban pyndonkam ïaki jingthoh (content) lyngba ki kor internet.
U la kyrpad ruh sha ki samla pule ba kin pyndonkam hok ïaka jingstad ka jong ki haka rukom kaba dei bad ban pyndonkam ïa ki e-content, ka ban long ruh kum ka jingmih bujli ïaki nonghikai ha kane ka juk stad kaba mynta bad kane hi kan wanrah shibun ki jingkylla haka liang ka pule ka puthi bad ka jingnang jingtip jong ki samla pule.