Kyrshan ka NPP Youth Front 1- Nartiang ïaka jingai sumar khmat ei ha Kiang Nangbah Govt. College

Jowai, Lber 14: Ka seng samla jong ka National People Youth Front (NPYF) 1-Nartiang Constituency kala ai ka jingkyrshan pisa ïaka prokram ai jingsumar khmat ei ïa ki samla pule ne ka ‘Free Eye Check up Camp’, bala khot pynlong da ka West Jaiñtia Hills District Adventure Sports and Mountaineering Club (WJHDAS&MC) ha ryngkat ka jingïatreilang bad ka Mission Nethralaya Eye Care Center, Shillong bad ka Kiang Nangbah Govt. College Student Union.
Ïa kane ka jingai jingsumar khmat ei ïa ki samla pule la pynlong ha Kiang Nangbah Govt. College Indoor Sports Halls kaba la sdang naduh hynnin ka sngi 14 tarik bad pynkut mynta ka sngi 15 tarik u Lber, 2024 baroh ki nong ïoh jingsumar khmat ki don haduh 600 ngut ki samla pule bad ki nongtrei ka College.
U President ka West Jaiñtia Hills District Adventure Sports and Mountaineering Club samla Sambor Surong haka jingkren sha ki lad pathai khubor ula ong ka jingthmu ban pynlong ïa kane ka ‘Free eye Check up Camp’ ka long kyrpang eh na ka bynta ki samla pule kiba wan na ka longïing ba duk, kaba long ruh shi bynta na ka jingdap saw snem jong ka Club naduh ba la seng ïa ka ha u snem 2020.
U samla Sambor ula pynshai na ka bynta kito kiba don ïa ka BPL Card yn ai jingsumar ei khlem jingsiew, katba ïa kito ki bym don Card BPL kin hap shim kumba 30 present bad kane ka jingai jingsumar kan dang ïaibteng ha kylleng ki jaka bad kumjuh ruh sha ki bynta ka West bad East Jaiñtia Hills.
Shuh shuh ula ïathuh haka por ba sdang ïa kane ka kam ka long kaba eh bha ïa u khamtam ha ka liang ka pisa pilaiñ hynrei dei da ka jingïarap u Blei la lah ban pynïaid shakhmat ïa kane ka kam ba bha jong ka Club, da ka jingwan shakhmat ka seng samla jong ka National People Youth Front 1-Nartiang Constituency mynta ka kynti ban ai jingkyrshan, la ong u samla Sambor Surong.
Katba u President ka KNGCSU u samla Evermore Rymbai ula pynpaw ka jingai khublei kyrpang ïa kane ka West Jaiñtia Hills District Adventure Sports and Mountaineering Club kaba la shim ïa kane ka bynta kaba donkam eh ban ai jingïarap ïa ki samla pule kiba donkam jingïarap ha ka bor ïohi bad kane kala long kaba jop da ka jingïarap ka Principal jong ka College kaba la ai jingbit ban pynlong ïa ka Prokram.
Ula pynsngew kum ki samla pule ki donkam bha ban ïoh ïa ka bor ïohi kaba biang na ka bynta ka pule puthi kaba kham shakhmat.
Shuh shuh ula pynsngew ba ka College mynta kala sdang ban wan ha ka jingkylla da ka jingwan hiar jurip jong u symbud myntri rangbha ka jylla ma Sniawbhalang Dhar dang ha kine ki khyndiat sngi, ha kaba la sakhi ïa ki Footpath ban poi sha College bad ki phyllaw la sdang ban shna ïa ki bad kynmen ba kine ki kam kin long kiba ïaid beit ïait ryntih da ka jingïarap jong kane ka sorkar kaba mynta.
Kum u President u buh ka jingkyntu ïa baroh ki samla pule ba kin buh ha ka jingduwai na ka bynta kane ka sorkar ba kan trei khambha shuh shuh na ka bynta ka College, ha ka juh ka por u khot ïa baroh ban don ka jingïatrei lang ha kino kino ki kam khnang ba kin long kiba jop.