27 ngut pdiang marbam ki nongpang TB ha Nongpoh, dang ïakhun tyngeh ban pynduhjait ïaka jingpang

Nongpoh, Lber 15: Ka ophis jong ka District Tuberculosis Officer, Ri-Bhoi District lyngba ka program Pradhan mantri TB Mukt Bharat Abhiyaan mynta ka sngi ka la pynlong biang ïaka prokram ban sam ïaki jingbam teimet (Nutritional Food Basket) sha kumba 27 ngut ki nongpang TB ki ba la tingkhun (Adopt) daka NEZONE Pipes & Structure & NTL STEEL Pvt. Ltd. lem bad ki nongtrei jong ka National Tuberculosis Elimination Program, ki ba long kum ki Nikshay Mitra ki ba la pynbiang ïaki mar bam jong kitei ki 27 ngut ki nongpang TB naka bynta 6 bnai.
Ïa katei ka program sam mar bam la pynlong mynta ka sngi ha Conference Hall Jong ka Civil Hospital Nongpoh bala wan ban don ryngkat da ka Dr. TS Momin District Medical Health Officer ka Ri-Bhoi, ka Dr. D Blah, Addl. DM&HO Ri-Bhoi, Dr. E. Kalwing District Tuberculosis Officer, Ri-Bhoi District, ki nongtrei ka NTEP, ki Manager jong ki ar tylli ki Private company kiba tingkhun ïaki Nongpang lem bad ki khynnah pule BSW jong ka Women’s College Shillong.
Kum ban shu pynpaw ba katei ka program Pradhan Mantri TB Mukt Bharat Abhiyaan (PMTBMBA) kadei ka program kaba la shim khia daka sorkar pdeng kaba la dep ban plie paidbah da ka President jong ka Ri India ka Drupadi Murmu haka 9 tarik Nailar 2022 halor ka thong ban rat diengkhong ïaka jingpang TB shuwa u snem 2030 bad lyngba kane ka program ka sorkar ka thmu ban pynïoh jingïarap naka bynta kiba pang TB bad ha kajuh kapor ban pynshlur ruh ïa baroh ki nongshnong jong ka Ri India naduh ki nongmihkhmat, ki ophisar, ki kynhun seng trei mon sngewbha bapher bapher, ki riew shimet ba kin phaikhmat ban ïarap sha kito kiba ioh ïa katei ka jingpang ha kaba ïadei bad ki jingbam kiba tei ïaka met.
Haba kren ha katei ka sngi naka liang ka Dr TS Momin bad ka Dr D Blah kila ong ba ka sorkar mynta ka dang ïakhun tyngeh ban pynduhjait ïa katei ka jingpang bad ai ka jingïaroh kaba khraw ïaki kompani ki riew shimet kiba la ting khun ïaki nongpang TB bad kane kan ïarap shibun ïaki ba kin ioh ban bam ïaki jingbam tei met ban ioh ka met kaba khlaiñ khamtam haba ki dang don hapdeng ka jingshah sumar ryngkat ka jingdih dawai.
Kila ong ruh ba ki don shibun ki nongpang kiba dang shah ieh khunswet ha kaba kila kyrpad ïaki nongmihkhmat, ki seng bapher bapher ki riew shimet ba kin mih shakhmat naka bynta ban ting khun kum ki Nikshay Mitra ïaki nongpang TB ba ka thong jong ka sorkar ban pynduhjait ïa ka jingpang TB shuwa u snem 2030 kan long kaba jop.