Nongpoh, Lber 15: U Director ka tnad Urban Affairs jong ka sorkar Meghalaya, u Bah E. Kharmalki mynta ka sngi u la leit ban plie ïa mawnongrim na ka bynta ban tei ïa ka jaka pynieng kali paidbah ha ka phyllaw ka Nongpoh Town Shopping Complex ha Ri Bhoi District.
Haba leit ban plie ïa u mawnongrim la shim bynta lang ruh da u President ka Synjuk ki Rangbah Shnong Ri Bhoi District, u Bah B.B Makdoh kum u symbut kongsan bad la sakhi lang ruh da ka jingdon lang u Bah S. Langstieh District Urban Officer ka Ri Bhoi, u Bah Rayonald Kharkamni, Secretary ka Nongpoh Town Committee, ki rangbah shnong bad ki riew rangbah. Ïa ka jingïalang la pynïaid da u Bah S.F Lyngdoh uba dei u Charman ka Nongpoh Town Committee.
Kum ban pynpaw, ka sorkar Meghalaya lyngba ka tnad Urba Affairs ka la mang haduh T. 10 lak tyngka ban tei ïa katei ka jaka pynïeng kali paidbah ha khmat ka Nongpoh Town Shopping Complex ha Nongpoh.
Haba ai jingkren ha kane ka sngi, u Bah E. Kharmalki u la ai jingïaroh ïa ka Nongpoh Town Committee ba dei lyngba ka jingshim khia ka town Committee ba ka sorkar lyngba ka tnad Urban Affair ka la mang ïa katei ka song pisa na ka bynta ban tei ïa katei ka jaka pynieng kali ban pynsuk ïa ki paidbah ha katei ka iew ha Nongpoh. U la ong ruh ba ka tnad Urban affair ka la shim khia bha ban peit ïa ki jingdonkam jong ki paidbah ha ki jaka sor bad kumba long mynta ka tnad urban affair ka la thaw ruh ki lad ki lynti ban wan rah ïa ki jaka thang briew (crematorium) ban pynduna ïa ki jingjaboh bad jingpynjot mariang bad ha kajuh ka por ruh ka tnad urban affair kan shim khia ruh ban buddien ïa ki jaka theh ñiut (Solid Waste Management) ha baroh ki district jong ka jylla.
Shuh shuh, u la kyntu ruh ban urlong shibun ki kam ai jingmyntoi la ki dei ha ki jaka sorkar ne ha ki jaka nongkyndong donkam ban don ka jingïatrei lang na baroh ki liang khamtam ki nongïalam shnong bad ki riew rangbah ka jylla, u la bynrap.
