Sdang ïalap election ka NPP ha Raliang WJH

Jowai, Rymphang, 04: Hadien ba ladep ka jingbishar ïa ki kot ki sla thep kyrteng jong baroh ki kyrtong ki ban aireng ha ka election sha ka JHADC, ha ka sngi Baar ka NPP ka la sdang ïa ka jingïalang ïalap elekshon ba nyngkong ha Raliang Constituency na ka bynta u kyrtong ka National People’s Party u Bah Bison Roy Lano.
Ha kane ka jingïalang la ïadonlang u MLA jong ka NPP u Bah Comming one Ymbon uba long ruh u Myntri ka Sorkar Jylla, u State Working President jong ka Party u Bah Octomewot Lamin, u Organising Secretary u Bah Elad Suting, u Publicity Secretary u Bah Lari Patwet bad ki rangbah jong ka shnong Raliang.
Ha kane ka sngi ki don ruh sa 11 ngut ki samla shynrang bad kynthei kiba la shah pynkup burom ha ka jingïalang.
U Bah Bison Roy Ïano u la kyrpad ïa ki nongshong shnong ba kin ai ka jingkyrshan ba pura ïa u khnang ba un poi sha ka thong khnang ba un ïoh trei shuh shuh ïa ki kam babha hapoh ka Constituency.
U Bah Commingone Ymboi kum u MLA ka thaiñ u la pynsgewthuh ïa ki paidbah ba kim dei ban don ïa ka jingïabishni kawei ka party ïa kawei pat party hynrei ki paidbah ki dei ban ïengskhem ha la ka jong ka nongrim khlem da kylla jingmut.