La donkam ïa ka District Council ban treikam katkum ka jingïaid ka por : Rikut Pareiñ

0

Jowai, Rymphang, 04: U kyrtong ka seng Congress na Saphai Sahsniang Constituency u Bah Rikut Parein ula pynsngew kumba long mynta ki aiñ hapoh ka District Council ki long kiba la tlot shaba palat wat ka rukom treikam ruh kam ïadei shuh bad kane ka juk ba mynta.
Da kaba ai nuksa haba aplai ïa ki land Holding Certificate bad ki Patta la hap ban ïeng laiñ tang ban ïoh ïa ka bai Stamp bad kane ka la ktah shibun eh ïa ka por jong ki paidbah. Ka por ka ladei ban pyntreikam noh da ki kor ki bor Internet bad Computer ne Digitalization khnang ban ïoh pyndap ïa ki kot jaka bad ban siew Online lyngba ki Common Service Centre.
La donkam ban pynkhlaiñ bad ban aibor ïa ki Dorbar Elaka bad ki Dorbar Shnong ban pynneh ïa ka jinglong bakyrpang jong ka jaitbynriew, ong Bah Rikut.
U la ban jur ka District Council ka don ïa ka tnad Market bad la dei ban pynbha ïa kane ban ïoh kam ki khun samla da kaba thaw ïa ki ïew dielang (Wholesale Market), khnang ba ki briew kiba nabar kin ym ïohlad ban pynhiar dor ïa ki mar rep kum u synsar bad u shynrai.
Kum u kyrtong MDC u la ong lada u ïoh ïa ka jingjop un ïaleh ban kyntiew ïa ki kam jngohkai pyrthei ha ki thaiñ Saphai bad Iooksi namar ka jingdon jong ka Wah Kulpi, kumjuh ïa ka thaiñ Sahsniang ba don ka Wah Myntang khnang ba ki khun sanla kin ïohlad ban seng ïa ki kam kum ka jaka sah Home Stay na ka bynta ki briew kiba nabar.
U ong shuh shuh, la donkam mynta ïa ka District Council ban ai ïa ka syrnot Schedule Tribe Certificate sha ki trai jylla, kata ka long ban thaw ïa ka aiñ ba thymmai. La donkam ruh ban pynbun ïa ki tnad treikam hapoh ka Council bad ban pynkup bor ïa ka JHADC katkum ka Riti synshar ka ri.
U Bah Rikut u la pynpaw ruh kum u briew uba wan na ka longïing kaba duk, u la kyrpad ïa ki paidbah, ki longkmie, ki longkpa bad ki khun samla ba kin ai ka jingkyrshan ba pura, da ka mynsiem jingïaieit.
“Lada nga jop ïa kane ka elekshon ka dei ka jingjop ïa ka spah bym khuid bad ka jingjop ïa ki kup shilliang ki sem shilliang, ki nongrep bad ki nongbylla sngi,” la ong u Bah Rikut.

Leave A Reply

Your email address will not be published.