Sam u Myntri Rangbahduh ka ri ïa ki Property Card hapoh ka skhim SVAMITVA

Shillong, K’ Lyngkot 18: Ha ka por kaba kyrpang bad kaba wanrah jingkylla ïa ki jaka nongkyndong jong ka India, u Myntri Rangbah duh Narendra Modi mynta ka sngi u la pynïaid ïa ka jingïalang sam ïa ki property card kaba heh tam hapoh ka Skhim SVAMITVA jong ka Tnad Panchayat Raj, kaba pynkupbor ïa 65 lak ngut ki nongshong shnong ha ki jaka nongkyndong ba kin ïoh ïa ki kot ki sla ban pyni ïa ka jinglong trai ha ka shi sngi.
Ha kane ka jingïalang la ïasohlang lyngba ka bor internet da u Myntri Sorkar Pdeng ba dei khmih ïa ka Tnad Panchayati Raj Rajiv Ranjan Singh ba la tip kum u Lalan Singh, Myntri Khynnah, Tnad Panchayati Raj, Prof. S. P. Singh Baghel lem bad u Secretary, Tnad Panchayati Raj u Vivek Bharadwaj. Ha kane ka jingïalang la ïadonlang ruh ki Lat jong ki Jylla bapher bapher, ki Lieutenant Governor jong ka Jammu & Kashmir bad Ladakh, ki Myntri Rangbah jong ka Odisha, Chhattisgarh, Madhya Pradesh, Rajasthan, Uttar Pradesh, Maharashtra bad Gujarat, ki Myntri Sorkar Pdeng, ki dkhot jong ka ïing dorbar thaw aiñ Parliament, ki dkhot jong ki Legislative Assembly bad ki Legislative Council, lem bad ki nongmihkhmat paidbah bad ki ophisar. La sakhi ïa ka jingïashim bynta shitrhem ki nongshong shnong kumjuh ruh ki dkhot Panchayat bad ki ophisar na ki tnad bapher bapher na 237 tylli ki Distrik, bad 9 ngut ki Myntri Sorkar Pdeng kiba la peit kyrpang ïa ki jingïalang sam ba la pynlong ha ki thaiñ.
Ka jingïalang e-distribution kaba kongsan, ba la pynlong lyngba ka video conferencing, ka kynthup palat 50,000 tylli ki shnong ha 10 tylli ki Jylla bad 2 tylli ki Union Territory, kaba long u mawmer ba kongsan ha ka rukom synshar ha ki jaka nongkyndong bad ka jingpynkupbor. Kane ka jingïalang ka kynthup ïa ki nongïoh jingmyntoi na Chhattisgarh, Gujarat, Himachal Pradesh, Madhya Pradesh, Maharashtra, Mizoram, Odisha, Punjab, Rajasthan, Uttar Pradesh bad ki Union Territory jong ka Jammu & Kashmir bad Ladakh.
Kane ka jingjop kaba khraw ka la pynlong ka jingpoi ka jingsam ïa ki property card hapoh ka SVAMITVA sha ka 2.25 klur.
U Myntri Rangbah duh, Narendra Modi u la ong ba san snem mynshuwa, la plie paidbah ïa ka skhim SVAMITVA ban pynthikna ba ki briew kiba sah ha ki jaka nongkyndong ki ïoh ïa ki property card jong ki. U la ong ba ki jylla bapher bapher ki peit ïa ki syrnot long trai da kaba peit ïa ki kyrteng bapher bapher kum Gharoni, Adhikar Abhilekh, Property Card, Malmatta Patrak, bad AwaasiyaBhumiPatta.”Palat 1.5 klur ki briew ki la ïoh ïa ki SVAMITVA card ha ki 5 snem ba la leit,” la ong u Modi. Ha kane ka prokram kaba mynta ka sngi, u la bynrap palat 65 lak ki longïing ki la ïoh ïa kine ki card. U Myntri Rangbah duh u la ong ba hapoh ka Swamitva Yojana, kumba 2.25 klur ki briew ha ki shnong ki la ïoh ïa ki kot ki sla kiba ïadei bad ka aiñ na ka bynta ki ïing jong ki mynta. U la ai khublei bad kitbok kitrwiang ïa baroh ki nongïoh jingmyntoi. Da kaba ong ba ka spah snem ba 21 ka don shibun ki jingeh, kynthup ka jingkylla ka suiñbneng, ka jingkyrduh um, ki jingeh ba ïadei bad ka koit ka khiah, bad ki khlam, u Myntri Rangbah duh u la ban jur ba sa kawei ka jingeh kaba kongsan ba ka pyrthei ka mad kadei ka hok jong ki jingdon jingem bad ka jingbym don ki kot ki sla katkum ka aiñ ïa ki jingdon jingem.
U Myntri Rangbah duh u la kdew ïa ka jingwad bniah ka United Nations kaba pyni ba bun ki briew ha ki ri bapher bapher kim don ïa ki kot ki sla kiba biang katkum ka aiñ na ka bynta ki jingdon jingem jong ki. U la bynrap ba ka UN ka la ban jur ban pynduna ïa ka jingduk ka donkam ïa ki briew ban don ïa ki hok ba ïadei bad ki jingdon jingem. U la ban jur hadien ba la ïohpdiang ïa ki kot ki sla katkum ka aiñ, da ki lak ki briew ki la shim ram na ki bank katkum ka nongrim jong ki jingdon jingem jong ki, ki la sdang ïa ki kam khaïi pateng barit baria ha ki shnong jong ki. U la bynrap ba bun na kine ki nongïoh jingmyntoi kidei ki longïing nongrep kiba rit ba ria bad kiba pdeng, bad ïa ki, kine ki property card ki long ka jingpynthikna kaba kongsan ïa ka jingshngaiñ ha ka ïoh ka kot. U Myntri Rangbah duh u la ong ba ki Dalit, ki longïing kiba dang sahdien bad ki riewlum kidei kiba shah ktah bha ha ki jingshim beaiñ bad ki jingbishar kiba jrong ha ki ïingshari. U la ong lyngba ka syrnot na ka aiñ, mynta kin lait na kane ka jingeh. U la ong la antad ba shisien ba la sam ïa ki property card ha baroh ki shnong, kan plie lad ïa ki kam ka ïoh ka kot ba shongdor palat 100 lak klur tyngka.
Ha kane ka jingïalang u Myntri Rangbah duh u la ïakren ruh bad san ngut ki nongïoh jingmyntoi jong ka Skhim SVAMITVA, kiba la ïasam ïa ki jingshem jong ki shaphang kumno ka Savmitva ka la pynkylla ïa ka jingim jong ki da kaba pynduna ïa ki jingia kajia, ïarap ban pynkylla pisa ïa ki jingdon jingem, kyntiew ïa ki lad kamai kajih bad kyntiew ka jingpynkupbor ha ka ïoh ka kot.
Ki nongïoh jingmyntoi ki long u Manohar Mewadana Sehore, Madhya Pradesh; ka Rachnana Sriganganagar, Rajasthan; u Roshan Sambha Patilna Nagpur, Maharashtra; ka Gajendra Sangitana Rayagada, Odisha; bad uVarinder Kumar na Samba, Jammu & Kashmir.
Ha ka jingai jingkren ha ka jingïalang, u Myntri Sorkar Pdeng ba dei khmih ïa ka Tnad Panchayati Raj, Rajiv Ranjan Singh ba la tip ruh kum Lalan Singh u la ban jur halor ka jingïar jong ka jingsam ïa ki SVAMITVA Property Card, kaba la poi sha 237 tylli ki distrik lyngba ki prokram. U la ban jur ba ka jingsam 65 lak tylli ki property card ka long ka por jong ka jingkylla, kaba pynkupbor ïa ki longïing ha ki jaka nongkyndong lyngba ki hok ha kaba ïadei bad ka jinglong trai. “Haba ka shnong ka khlaiñ, ka ri ka khlaiñ,” la ong u Myntri Sorkar pdeng, da kaba ban jur kumno ka skhim SVAMITVA ka la long ka nongrim jong ka jingpynkupbor ïa ki jaka nongkyndong.
U la ïaroh kyrpang ïa ka rukom treikam jong ka skhim ba don nongrim ha ka jingïamir jingmut lang ha kaba ïadei bad ki kot ki sla kiba ïadei bad ki jingdon jingem, bad u la ong ba kane ka rukom treikam ka la pynduna ïa ki jingia kajia hapdeng ki shnong bad kyntiew ïa ka jingïashongsuk shongsaiñ ha ka imlang sahlang.
U Myntri sorkar pdeng u la ban jur ba 2.25 klur ki longïing ha ki jaka nongkyndong ki la ïoh jingmyntoi na ka skhim SVAMITVA haduh mynta. U la ong ba kine ki property card ym tangba ka ïarap ban ïoh ïa ki jingshakri jong ki bank bad ka jingïoh ram hynrei ka long ruh kum ka atiar ba khlaiñ ban pynbeit ïa ki jingia kajia. U Myntri sorkar pdeng u la kdew ïa ka bynta jong ka skhim ha ka jingpynkupbor ïa ki longkmie ha kaba bun ki longkmie mynta ki ïoh jingithuh kum ki trai lane kiba long trai lang ïa ki jingdon jingem, kaba long ka sienjam ba kongsan sha ka jingryntih kyrdan hapdeng kynthei bad shynrang ha ki jaka nongkyndong. “Ka SVAMITVA kam dei tang shaphang ki hok kiba ïadei bad ka jinglong trai, kadei shaphang ka jingpynlong ïa ki shnong jong ngi kiba lah ban kyrshan dalade bad ki briew jong ngi ha ki jaka nongkyndong Atmanirbhar,” la ong u Myntri sorkarpdeng. U la kren shaphang kumno ka Skhim SVAMITVA ka plie ki lad ïoh kam ba thymmai bad ïarap ïa ka jingseng kam lajong ha ki jaka nongkyndong lyngba ka jingïoh lad shuh shuh ban ïoh ïa ki jingshakri kiba ïadei bad ki kam pisa. Kane ka rukom treikam, u la ban jur, ba ka ïahab bad ka thong Atmanirbhar Bharat jong u Myntri Rangbah duh, ha kaba ki jaka nongkyndong jong ka ri ki don ka bynta kaba khraw ha ka jingkiew shaphrang bad ka jingseisoh jong ka ri.
Ka skhim SVAMITVA, kaba la plie paidbah da u Myntri Rangbah duh Narendra Modi ha ka 24 tarik Ïaïong, 2020 ka la long ka sienjam wanrah jingkylla ha ka rukom peit ïa ki kam kiba ïadei bad ka jaka ha ki thaiñ nongkyndong. Ka skhim ka la dep buh jingtip shaphang palat 3.17 lak tylli ki shnong da kaba pyndonkam ïa ka drone technology, kaba kynthup 67,000 square kilometre ki jaka sah briew ha ki jaka nongkyndong ba shongdor T. 132 lak klur. Ka jingjop jong ka SVAMITVA ka la ïoh jingithuh na kiwei kiwei ki ri, ha kaba la pyni ïa ka rukom peit ka India ïa ki kam kiba ïadei bad ki jaka puta ha ka International Workshop ha u Lber 2025 bad ka World Bank Land Governance Conference ha u Jymmang 2025. Kane ka jingïoh jingithuh na kylleng ki ri ka pyni ïa ka jinglong nongïalam ka India ha ka jingpyndonkam ïa ka teknoloji na ka bynta ka roi ka par kaba ïaineh bad ka rukom synshar ha ki jaka nongkyndong.