Kyrmen u Myntri Border Area ba ka jingpynbeit pud kan ïaid noh ha ka wat baar

Shillong, K’ lyngkot 18 : U Myntri ba dei peit ïa ka tnat Border Ares Development, u Rakkam A Sangma u la ong ba ka jingpynbeit pud hapdeng ka Jylla Meghalaya bad Jylla Assam kan ïaid hynrei ka jingïadei para briew ka dei ban long da kawei ka rukom.
Haba kren bad ki lad pathai khubor dang shen, u Rakkam u la “Kam don pat da kawei ka rukom pynbeit pud ban ïa ka jingïadei parabriew. Nga sngew ba ha ka jingïadei parabriew, kam don ïa u pud kam don sam, wat la u pud u sam ïa ka khyndew u don.”
Shuh shuh u ong ba ki ar Jylla, kata ka Meghalaya bad ka Assam ki dei ban pynïaid shakhmat ban pynbeit ïa u pud u sam ba dang sah ha ka kylla kaba ar na ka bynta 6 tylli ki jaka ha khappud, kumba ki la dep ban ïapynbeit ha ka kylla ba nyngkong ha ki snem ba la leit.
Une u Myntri u la ong ruh ba ka jingïakren pynbeit pud ka la sangeh shwa mynta shi por, namar kiba bun ki daw, khamtam ba ha Meghalaya ka don ka jingpynkhreh ïa ka elekshon. Tangba u ong pat ba ka Sorkar Jylla hapoh ka jingïalam u Myntri Rangbah Conrad K Sangma ka la kut jingmut pat ban pynbeit ïa kane ka jingeh bad sdang biang ïa ka jingkren pynbeit pud.
Shuh shuh u la ong ruh ba ki Regional Committee ki dang pynkhreh shaid-shaid mynta ïa ki kaiphod khnang ba yn lah ban aiti noh sha ka Sorkar na ka bynta ban pynïaid shakhmat ka jingpynbeit pud ïa ki 6 tylli ki jaka ba dang sah ha ka kylla kaba ar.
“Kadei ka jingshisha ba ki don ki jingeh, hynrei kum u Myntri nga kwah ban kyrpad ïa ki paidbah nongshong shnong ha khappud , da kaba burom ïa ki mat ba phi don, ka long kaba donkam ban don ka jingïadei parabriew da kaba shong ba sah lang hapdeng ka jingsuk jingkmen namar kam don da kawei pat kaba lah ban pynbeit ïa u pud kaba kham bha ban ïa kata,” bynrap biang u Myntri.
Ha kawei ka liang u Myntri ba khmih ïa ka bha ka miat ha khappud, u la ïathuh ba Sorkar Jylla ka la ju ïoh pisa na ka Sorkar Pdeng ban pyntreikam ïa ki skhim pynroi ha khappud, hynrei mynta la kumba 3-4 snem kane ka jingai pisa ka la sangeh noh, bad mynta ka Sorkar Jylla ka la pyrshang na ka skhim lajong ban ïarap ïa ki paidbah ha khappud ha ka liang ki kam pynroi.