Nongpoh, Jylliew 25: Ka long shisha ka jingkmen kaba khraw ïa kito kiba don jingduna ha ka dkhot met bad ruh na ka bynta kito ki riew tymmen kaba la kot sha ka 65 snem ka ryta, ha kaba mynta ka sngi kawei na ka seng treimon sngewbha ka Ri Bhoi Area Welfare Association (RAWA) ka la sam da ki tiar ban kyrshan lem ïa kito kiba don jingduna ha ka dkhot met bad ruh na ka bynta ki riew tymmen.
Ïa kane ka jingsam ïa kitei ki tiar ban kyrshan lem ïa kitei kiba donkam ïa ka jingïarap ka imlang ka sahlang la pynlong ha Umling C&RD Block bad la kyrshan ruh ïa kane ka prokram ai jingïarap sha kitei ki paradoh ki parasnam da ka jingdon bynta lang ka Artificial Limbs Manufacturing Corporation of India (ALIMCO) bad ka Pradhan Mantri Divyasha Kendra (PMDK) – Shillong.
Kumba long ha kane ka sngi, na ki 147 ngut, 30 ngut ki dei kiba don jingduna ha dkhot met bad 117 ngut ki dei ki riew tymmen kiba la ïoh ïa ka jingïarap ba kyrpang lyngba ka jingphai khmat ka RAWA kum ka seng kaba ju shakri ïa ka bha ka miat bad ka roi ka par ki paidbah ha ka them Ri Bhoi.
Ki lad jingïarap ba la ïarap na ka bynta ki riew tymmen ki dei lyngba ka skhim RVY bad ki tiar ban kyrshan pat ïa kito kiba don ka jingduna ha ka dkhot met la sam lyngba ka skhim ADIP bad 2 ngut ki ba don jingduna haka dkhot met ki la ïoh pdiang kyrpang da ka Tricycle, ban pynsuk ha ka leit ka wan na ka daw ba kim lah ban ïaid ban ieng hapeng ka jingduna jong ka dkhot met.
Haba sam ïa kine ki lad jingïarap sha kitei kiba don jingduna ha ka dkhot met bad sha ki riew tymmen la ïalam da ka Kong Balakyntiew Umbah kum ka President ka RAWA bad la don ryngkat ruh ka District Social Welfare Officer ka Ri Bhoi, ka Kong NF. Sun lem bad kiwei kiwei.
