Plie u Myntri Rangbah ïa ka Williamson Sangma state Museum kaba la dep shna itynnad

Shillong Jylliew 25: U Myntri Rangbah ka Jylla u Conrad K. Sangma ha ka sngi Balang ula plie ïa ka Williamson Sangma Meghalaya State Museum kaba la dep shna pynbha ha ka jingïalang kaba la long ha Soso Tham Auditorium, Shillong.
Ha kane ka jingplie la ïadonlang ruh u Myntri ka Arts & Culture u Bah Paul Lyngdoh, u Myntri ka tnad Bording u Abu Taher Mondal bad kiwei kiwei ki kynrem lyndan.
La pyntip ruh ba ïa kane ka Museum la pyndep ha kaban pynwandur thymmai kat kum kane ka juk kaba mynta bad kaba don ïa ka jingpynwandur kiba thymmai, kaba don ruh ïa ki kor teknoloji kiba kongsan kaba kyrpang ba kynthup ïa ka QR-based Exhibits bad ki jingpyni lyngba ki kor Digital.
Ha kaba ïadei bad kane u Myntri Rangbah ula pynpaw ba kane ka sienjam kadei shi bynta jong ka jingïohi jngai ban rakhe, ban buh ha ki jingthoh bad ban pynneh pynsah ïa ka jingriewspah ka jylla ïa ki jingdon jingem kiba rim kat kum ka Kolshor ha ryngkat bad ka jingkyntiew ka ïoh ka kot ha ka jylla.
U la ong, “Kam dei tang ka jingpyni ïa ka jinglong kyrpang bad ban pynneh pynsah ïa ka. Ka jingkylli kaba heh ka long kumno ba pynlong ïa ka kaba la pynwandur bha, kumno ban pynrung ïa ka kolshor barim bajah bad ban pynkylla ïa ka sha ka ïoh ka kot.”.
Na ka liang u Myntri Rangbah u la pynbna ba ka tnad pule puthi kan sa pynmih ïa ka jingbthah na ka bynta baroh ki khynnah pule ba kan long kaba kongsan bha ïa ki ban leit jngoh ïa kane ka Museum, da kaba pynpaw ïa ka jinglong kongsan ban pynngam ïa jingsngewthuh halor ka kolshor bad ka jingïaroh hapdeng ki samla.
Ula ïathuh ba lyngba ka Chief Minister’s Research Grant (CMRG), ka jingwad bniah ha kaba ïadei bad ka kolshor bad ka roi ka sab la dep ban sdang. Ula ïathuh ba ka jingkhmih bniah ia ki jingwad bniah ka la pyni ïa ki jingmih kiba kham phylla, kynthup ïa ka AI-based Translation bad ki tiar Phonetic na ka bynta ki ktien tynrai, ka jinglap bad ka jingbuh ha ki jingthoh ïa ki 71 tylli ki jingïalehkai tynrai ki Garo bad ka jingpyrshang ban thaw ïa ki lad ha kaba ïadei bad ka Archaeological Tourism ha Garo Hills bad ki mawbynna kiba rim naduh u 1200 BC ne Shwa U Khrist.
U la ong ba Ïa kitei ki jinglap yn sa lum thup ban sam ïa ki jingtip sha ki paidbah lyngba ki kot lyngkdop bad ki jingthoh ha ki kam pule, ban nang pynkhlaiñ ïa ka jingnang jingtip ha kaba ïadei bad ka kolshor ha ka jylla.
Haba kren halor ka jingpyrshang ka jylla ban thaw ïa ka ïoh ka kot da kaba kyntiew ïa ka kam seng lajong kaba ïadei bad ka kolshor bad ula pyntip ba lyngba ka PRIME Program, ki nongsengkam lajong ki la ïoh ïa ka jingkyrshan ban pynmih ïa ki jingbuh sah kynmaw bad ki jingthaiñ kiba don dor.
U la pyntip ruh ba kiwei ki ri kum ka Vietnam ki la khaïi ïa ki mar kiba la pynmih na ki siej, kumta la kyntu ban don ka lad kaba paka bha ban pynmih ïa kum kitei ki karkhana kiba don ïa ka jinglong tynrai.
Haba kren ïa ka jingpynïaid ka sorkar ïa ka OTT Platform, “Hello Meghalaya”, ula ong ba kane ka rynsan ka la long ka atiar ba kongsan ha ka ban buh ïa ki jingtip bad ban kyntiew ïa ka kolshor tynrai, ka tem ka put, ka histori lyngba ki phlim, ki documentary bad ki Digital Content.
U la ong, “Kaei kaba ngi lah sdang lyngba ka Hello Meghalaya mynta ka lah kylla kum ka mat jong ka jingïakren ha kylleng ka ri. Kane ka rynsan ka la ai ïa ka sur, ïa ka Kolshor ka jong ngi ha ka lynti kaba biang bad kaba don ïa ka jingtbit..
Ula pyntip ruh ba ka Parish ha Sohra kadei ka ïing kaba don ïa ka jingsah kynmaw ïa u St. Don Bosco – kaba pynlong ïa ka kawei na ki shikham eh jong katei ka jaka ha ka pyrthei.