Sakhi ki riewngeit ka Mawbri Parish ïa ka jingkñia Mass ba nyngkong u Fr. Evansius Rymbai

Nongpoh, K’lyngkot, 19: Tang hadien shi sngi ba u Archbishop ka Shillong Archdiocese u la pyndep ïa ka jingpynkyntang Lyngdoh Sohblei ïa u Fr. Evansius Rymbai ryngkat kiwei kiwei ki Dikon ha ka sngi Saitjaiñ ha Iingmanebah Cathedral of Mary help of Christians, Shillong, u Fr. Evansius Rymbai ha ka sngi U Blei da ka jingkmen u la pyndep ïa ka ka kñia ka khriam kaba nyngkongeh da ka Mass Bakhuid ha ka Balang Shnong Thadnongiaw kaba hap ha Mawbri Parish.
Ha kane ka Mass ainguh jong u Fr. Evansius Rymbai la don ryngkat lang u Fr. Hilarius Lamare, u Fr. John Madur, u Fr. Valestine Marbaniang uba dei u Parish Priest ka Mawbri Parish, u Fr. Pius Shadap, kiwei kiwei ki Lyngdoh Sohblei, ki Sister bad da ki hajar ngut ki riewngeit ka Balang Katholik.
Kum u Lyngdoh Sohblei uba la shah pynkyntang, u Fr. Evansius u la shim ruh ïa ka bynta kaba kongsan ban pyndep ïa ka jinglehniam jong ka Mass Bakhuid bad ruh ban sam ïa ka Ktien jong U Blei lyngba ka Jingthoh Bakhuid bad sam ïa ka met bad ka snam jong u Jisu Khrist kaba long ka jingbam ba kynja mynsiem jong ki riewngiet Katholik.
U Fr. Evansius haba pharia ïa ka Ktien jong U Blei, u la phla ba kane ka jingshah pynkyntang Sohblei ka dei ka jingkhot jong U Blei bad ban Lyngdoh Sohblei namarba kam dei ka kam kaba suk bad shibun ki jingeh bad ki jingtynjuh, hynrei dei lyngba ka jingkhot U Blei ba u la lah ban shim ïa kane ka lyngkor kum u Lyngdoh Sohblei bad ban im hok, ban im sotti shi junom.
U la kyrpad ïa ki paidriewnget jong ka Balang ba kin kynmaw lem ha ki jingduwai khnang ba un dup lah ban ïaineh haduh ba kut ban long kum u nongsharai mynsiem jong ka Balang. Ha kajuh ka por, u la ai khublei kyrpang ruh ïa ki kmie ki kpa, ïa ka ing ka sem bad ki Phadar kiba la kyrshan ïa u ban poi sha kane ka jingshah pynkyntang Lyngdoh namar lada ym don kiba ai mynsiem ka long kaba eh ban shim ïa kane ka bynta ban long kum u Lyngdoh Sohblei.
Hadien ka Mass Bakhuid la pynlong ruh ïa ka jingmane ïa ka Sakramen Bakhuidtam ka Duwan da ka jinglehniam kaba shongkun shongblei bad la pynbud pat sa ka jingleh burom ïa u Fr. Evansius Rymbai da ka Parish, ka Sub District, ka Balang Shnong bad ki paid riewngeit ka Balang.