Sa tang ka Ïingbishar Meghalaya High Court kaba ki samla wad kam Sorkar ki dang don ïa ka jingkyrmen

Ka Meghalaya High Court, ka la lap daw imat, ïa ka jingleh buit buhrieh jong ka District Selection Committee (DSC) Jowai, ha ka jing thungkam LD cum Typist, ha kaba ka la pynsangeh noh ïa ka personal interview, kaba dei ban long ha ka 1tarik Naitung 2026.
Na ka jingshisha kaba mih ha kashari; ki kam kiba lait, ki don 34 tylli ha katei ka DSC, katba ka jingkhot personal interview, ka long tang ïa ki 68 ngut bad katei ka mut ba uwei un ïoh bad uwei un duh noh ïa ka kam. Ha ka jingïatai ha kashari, kam shym don ka jingai jingkheiñ ïa ki katno ngut, kiba applai ïa kitei ki kam bad sa katno ngut kiba leit sha ka interview, namar ba katkum ka aiñ jong ka sorkar India, kaba ka sorkar jylla ruh, ka bud hi kumta, ka long ba lada ki don 34 tylli ki kam, kiba lait, kumta ka jingkhot personal interview ka dei ba long lai shah lane ïa 112 ngut ki samla kiba ïakhun ïa katei ka eksamin.
Lada katei ka dei ka rukom pynïaid kaba ka sorkar jylla, ka hap ban bud bad kaba ki District Selection Committee ruh ki hap ban ïaid da katei kajuh ka rukom, kumta ka pyni ba ka DSC Jowai, ka la pynkheiñ ïa ka kyndon, tang ban ailad ïa ki katto katne ngut kiba ki sngew ïahab bad mynta haba ka kashari, ka la shimti ïa katei ka kam, ka dei ban tih tyllong ïa baroh ki marks ba ki ïoh kine ki samla kiba ïaleh interview, ba kan paw ka jingshisha hakhmat ki samla kiba kwah kam ha katei ka District.
Ka don ruh sa kawei ka mat, kaba ka High Court, ka dei ban tih bniah bad kata ka long halor ka jingkynnoh jong ka seng VPP, ba u don uba thoh tang 4 tylli ki jingkylli, na ki 50 tylli kiba la ai ha katei ka eksamin, hynrei utei ruh u pass thik thik bad u shah khot sha ka personal interview.
Kine ki mat ki donkam bha, na ka bynta ban bishar bniah, wei haba ka kam, ka la poi ha kti jong ka kashari, namar kam dei shuh tang ïa ka eksamin, hynrei ka dei ruh ban ngam kham jylliew, ba kan tip ïa U Chairman bad ïa ki dkhot kiba ha khlieh jong ka DSC Jowai bad la ki dei kiba la bit ne em ban pynïaid ïa kitei ki eksamin thungkam ne ïoh ki long kiba la shu jied, tang na ka daw, ba ki don sha ka liang synshar.
Ka la dei ruh lyngba jong kane ka mukotduma, ba ka Meghalaya High Court, kan shim kabu ban tih bniah ïa baroh ki District Selection Committee (DSC) ha ka jylla, ba ka jingthungkam kam dei ban long ka komiti jong ki riew saiñ pyrthei, hynrei da ki riew shemphang ha katei ka kam.
Kumba la ju pynbna na ka por sha ka por na ka liang ka Sorkar jylla ba kan wan rah ïa ka jingkhuid jingsuba ha ka liang ka thungkam thungjam ha baroh ki kam Sorkar khamtam eh ba ha kine ki Sngi ba u Myntri Rangbah ka jylla u Conrad Sangma u la ïathuh ba ka kynhun Myntri sorkar jylla ka la mynjur ban pynbha ïa ka rukom treikam jong ka Meghalaya Public Service Commission da kaba wengnoh ïa kawei ka kyndon bad da kaba wengnoh ïa kane ka kyndon kan ïarap ïa kane ka commission ban lah treikam bha nangne shakhmat ba kiba thep kam bad kiba ïoh kam ruh kin beit tang kito kiba da shemphang bad kiba stad da shisha.
Hynrei lada ka long pat ba ki la don ki jingkynnoh ba don ka jingthurmur jong kawei na ki District Selection Committee ha ka jylla, ka la buh ka jingkylli kaba jur bha ba katei ka kyntien jong u Myntri Rangbah ka shu long tang ban tep eit miaw ïa kaei kaba la jia ne ka dei shisha kaba da thmu hok.
Kum ha ki por kiba mynshwa na ka liang ka KSU Sengkmie lyngba ka Employment Cell jong ka, ka la ju leit ïakynduh na ka por sha ka por ia ki chairman jong ka MPSC ban kdew ia ki thliew jingdkoh treikam da kaba ai ruh ïa ki point ban pynbha, hynrei la ïohi ba na ka liang katei ka shnat thungkam thungjam jong ka jylla ka la pynslem kai bad pynmih biang na ka por sha ka por ia ki kyrteng jong kiba pass ha ki eksam bapher bapher, ïa ki kyrteng kiba bakla.
Kumta kaei kaba donkam bha mynta ka long ïa ka Ïingkashari Meghalaya High Court ba kan tuh bniah bha ïa kine baroh ki jingduna khnang ba kan wanrah biang ka jingkyrmen ïa ki samla kiba aplai kam Sorkar, naba wat hapdeng ki jingkyrduh kam ki ïakhun bad pynkhreh tyngeh ban pass bad ban ïohkam naba ki angnud ban khyllie ruh ïa kiei kiba ki la pynlut naduh ka por ba ki la leit sha ki skul bad don ruh ki samla kiba kwah ban ïarap lang ruh ïa ki kmie ki kpa ne ki hynmen ki para da kaba ïoh kam ki lah ban ai khaw, pyndap pynbiang lem ïa la ki jong ki ïing.