Sa ha ka thaiñ Ranikor hiar ka HANM ban pynïoh jingsumar khmat ei ïa ki paidbah

Mawkyrwat, ‘Nailar, 23: Ka Hynñiewtrep Achicks’ National Movement (HANM) jong ka South West Khasi Hills District mynta ka 23 tarik u ‘Nailar 2024 ka la ïoh ban hiar sa ha ka thaiñ Ranikor ban pynlong ïa ka jingsumar khmat ei ne Free Medical Camp ban ai jingïarap na ka bynta ki paidbah hapoh jong ka shnong Ranikor, South West Khasi Hills District.
Ha ka jingai jingsumar khmat ei ba la pynlong da ka HANM jong ka South West Khasi Hills District ki paidbah kiba la wan poi ha ka jingshah sumar ki long baroh 67 ngut ba kynthup naduh ki rangbah bad ki longkmie.
Ha ka jingïalang ba lyngkot, u bah Lambokstar Marweiñ, President jong ka Hynñiewtrep Achicks’ National Movement (HANM) jong ka South West Khasi Hills District ula ong ba ïa kane ka program la sdang ka naduh ka 15 tarik u Ïaïong, 2024 haduh mynta u bnai ‘Nailar, 2024 ha kaba ki la sdang ïa na thaiñ Mawkyrwat bad mynta ka sngi ka 23 tarik u ‘Nailar 2024 ki la ïoh ban hiar sa ha ka thaiñ Ranikor ha kaba ki paidbah na kylleng ki shnong ki la wan shakhmat ban shim jingsumar.
Namarkata, ka HANM ka ai khublei ïa ki ASHA bad ïa ki bor shnong ba ki la lah ban ai ïa ka jingïatreilang bad ka seng kumjuh ruh ïa ki paidbah ba ki la wan shakhmat ban wan shah sumar watla ka seng ka pyrshang da i bor barit eh ban don bynta lem ha ka imlang sahlang kumno ban ïarap khamtam ïa kiba duna ha ka ïoh ka kot namar da kaba pynlong ïa kiba kum kine ki prokram ban sumar ïa ki briew kiba don jingpang ha ki khmat kan long ka jingïarap na ka bynta jong ki
Kiba la ïa donlang ha kane ka sngi ki naduh ki dkhot jong ka HANM, u Secretary Shnong Ranikor, bah B. Marweiñ bad ki wei de ki ‘riew rangbah bad ki paidbah jong kane ka thaiñ Ranikor.