Amlarem, Nailar, 23: Da ka jingïatreilang jong ki paidbah naduh ki longkmie longkpa bad ki samla ha ka sngi Thohdieng ki la mih ban pynkhuid ïa ki shnong ki thaw da ka jingpynbeit jong ka Dorbar Shnong ba la ïashim bynta lang da ki Self Help Group.
Ha kane ka sngi, la pynkhuid ïa ki tyllong umbam, umdih, ki lynti synkien, ki skul bad ki jaka ba pher ba pher kiba don hapoh ka shnong.
U Waheh Shnong ka Pdengkarong u Bah Kolmen Pohshna u la ïathuh ba paid nongshong shnong manla u snem ki ju mih ban pynkhuid ïa ki sawdong sawkun jong ka shnong ban lait na ki jingjaboh bad ban wanrah ïa ka khuid ka suba bad ka koit ka khiah.
Ki paidbah nongshong shnong ki la kyrpad ruh ïa ka komiti Shnong ba kan wad ki lad ki lynti namar dang bun ki iing ba mih thymmai kiba dang donkam ïa ki painkhana, kumjuh ruh ha ki skul ba ki donkam ïa kine ki jaka leit painkhana, ba kin kyrpad ruh ïa ka Sorkar khamtam ïa ka tnat PHE ban wad ki lad ki lynti ban pynïoh skhim ïa ka shnong Pdengkarong kaba dang donkam shibun ki painkhana ban ïada na ka jingjakhlia bad jingpang jingshitom.
La kyrpad ruh ïa ka MeECL ha kaba ïadei bad ka jingpynbiang ïa ki Post Electrict kiba dang duna bad bun kiba la sniew ruh bad la kyrpad ruh ïa ka MeECL ba lada don ka skhim ba ka sorkar kan ai Free Connection na ka bynta ki longing ki baduk namarba dang bun ki longing ki bym pat don ïa ka bording.
