Jowai, Rymphang 16: Ka Dorbar Shnong Tympang-Iawmusiang, Jowai ryngkat ka Tympang Club, Jowai mynta ka sngi Palei kila pynlong da ka ‘Common Platform’ na ka bynta ki kyrtong ki ban ïakhun ïaka Election MLA na ka 2-Jowai L.A. Constituency.
Ïa kane ka ‘Common Platform’ la pynlong ha ka por 7 baje janmiet ha Tympang Club Hall ha kaba baroh kitei ki kyrtong ba don san ngut kila wan ïashim bynta lang bad ban pynsngew ïa ki thong treikam jong ki hapoh ka Constituency.
La pynïaid ïa kane ka Common Platform da u ma Rupaia Lamar bad hashwa ban poi sha ka jingai jingkren jong ki kyrtong la pynlong ïa ka jingpynkhalai nusib katkum ki No ba ki ïoh, ha kaba la wan ban kren nyngkong da u ma Moonlight Pariat na ka UDP, ba ar u ma Daniel Dan na ka INC, ba lai u ma Wailadmiki Shylla na ka NPP, ba saw u ma Allan K. Suchiang na ka BJP bad ba san da u ma Awhai Andrew Shullai.
Na ka liang ki nongpynïaid ïa kane ka Common Platform kila buh ruh ïaki kyndon da kaba ailad 30 minit marwei ïaki kyrtong ban kren pynshai ïaki nongrim ba ki ïeng ïaleh ïa kane ka Election bad kumjuh ruh hadien ba la dep lut baroh, nangta ba ailad sa 5 minit marwei ba kin kren pynkut (Response Time).
Baroh kitei ki Kytong kila pynsngew hala ki jong ki nongrim kiba ki angnud ban trei na ka bynta u paidbah ka Constituency, ha ka juh ka por kiba pynshai ruh shaphang ki ki rukom treikam jong ki party jong ki lada dei ki National Party ne ki Party riewlum.
Shuh shuh kila pynsngew ïa ki thong ba hakhmat eh jong ki ban trei hapoh ka 2-Jowai Constituency bad ki jingmyntoi ba kin wanrah ha baroh ki liang naduh ka jingbha jingmiat ha ka pule puthi, ka koit ka khia, ka roi ka par, ka khiïi ka pateng nalor kiwei kiwei de.
