Wat phah shuh da u ‘Thlong’ phah noh da u ‘Synrei’ ha Assembly: President HITO

0

Mawkyrwat, Rymphang, 16: U President ba rangbah jong ka Hynñiewtrep Integrated Territorial Organisation (HITO) Central Body, u bah Donbok Dkhar u la ong ba kum ki paidbah jong ka South West Khasi Hills District ba shwa ban poi kata ka sngi ban jied ïa ki nongmihkhmat sha ka Ïing Dorbar Thaw-aiñ ki dei ban long ki briew kiba ïar ha ka jingmut jingpyrkhat ba kim dei shuh ban phah da u ‘Thlong’ hapoh Assembly hynrei phah noh da u ‘Synrei’ khnang ba kin ïa dur hapoh ka Ïing Dorbar Thaw-aiñ ban thaw ïa ki aiñ ki kanun kiba biang.
U ong kumtei ha kawei ka Awareness Programme ban pynshai paidbah ba la pynlong da ka Hynñiewtrep Integrated Territorial Organisation (HITO), South West Khasi Hills District ha ïew Mawkyrwat shwa ka sngi jong ka jingjied ïa ki nongmihkhmat hapoh ka Meghalaya Legislative Assembly namar ba ha kine ki snem kiba la dep haba ki paidbah ki jied ïa ki nongmihkhmat bunsien kim da pyrkhat than ba ïa kiba kum kino ki briew kin phah ban don hapoh Assembly namar la ju ïohi ba kiba bun hi ynda ki la jop ki shu leit shong khlem da pyndonkam hok ïa kaei kaba ki ki la kular hakhmat ki paidbah.
“Jied ïa ki ïa ki nongïalam kiba lah ban thaw ïa ki mat treikam kiba biang ha ka liang ka ïoh kam ka ïoh jam jong ki khun samla, ymdei ban bieit ïa ki jingbhah treikam ba shipor hynrei dei ban dawa beit da ka kam ban long junom ne permanent”, ong u President ka HITO bad lada ki nongmihkhmat ki wan ha ïing pdiang sngewbha beit ïa ki da kaba ai ha ki da u syntiew kulap uba don shiah bad ong ba lada ki donkam ïa ka vote shim ïa une u syntiew bad thoh de ïa ka jingïateh kular bad ki dei ban shna ïa kita ki aiñ ne policy ba paka.
U bah Donbok Dkhar ula kren ruh shaphang ki lad pynroi kiba dei hok jong u paidbah da kaba pynshai ba kam dei ba la ai da ki nongmihkhmat hynrei dei ba u paidbah hi uba ai namar haba ngi thied jingthied ka khajna ka la don lypa bad dei ka sorkar hi ka hap ban pyrkhat ban ai ïa kita ki bhah kiba biang na ka bynta ki paidbah nongshong shnong kum ki lynti ki synkien, ka umbam ka umdih kaba biang, ki jaka pule kiba biang, ki jaka sumar kiba biang. Namarkata, u kyntu ïa ki paidbah ba ki dei ban long kiba husiar ha kane ka jingjied ïa ki nongïalam namar kane ka South West Khasi Hills District ka don ruh ka jingïatyngkhuh bad kiwei pat ki ri ne ki jylla.
Ha kawei pat ka bynta jong ka jingkren jong u bah Donbok Dkhar, President ka HITO Central Body, u la ïathuh ba ka HITO kam ju tieng bad kam ju smiej ïano ïano namar lada ki don ba thmu ban ïaleh da ka aiñ, ka ruh ka nud beit ban tur, lada ki kwah ïa kawang ne pyni bor ha ki khubor ruh kim salia namar dang shen u ong u Myntri Rangbah ka Jylla, u Conrad K. Sangma, “Ki HITO ki dei ki briew kiba bym don kam don jam”. Kumta u President u la ong ba haba la kynduh para khla te la hap hi ban ïa dur bad ban ïa jubab ïa kata da kaba ong, “Lada ngi dei kita ki Jobless, ma me lei me dei u Useless, u Hopeless bad u Careless” (Ngi dei kita ki bym don kam donjam, ma me lei dei u bym ler kam, uba pynduh jingkyrmen ïa ki khun samla).
Ka jingthmu jong kane ka jingïalang ka long ban pynsngewthuh ha ki paidbah jong ka South West Khasi Hills District ba kim dei ban shu ngop bakla ha kane ka jingjied ïa ki nongmihkhmat namar wei la bakla ban jied kata la eh ban phai biang. Kumta lyngba kane ka jingïalang, ki nongkren ki la dep ban pynshai bad pynsngewthuh ba kum ki paidbah kim dei ban ngop khamtam eh ki sbai ba shu thok, namar lada shim ka long kumba la shah thied bad shah pyndonkam bakla.
Ki nongkren ha kane ka sngi ki long u bah Donbok Dkhar, President ba rangbah jong ka HITO Central Body, u bah Pynshngaiñ S. Lyngdoh uwei na ki samla jong ka dong ka thaiñ bad u bah Polius Thyrniang, President ka HITO, South West Khasi Hills District.

Leave A Reply

Your email address will not be published.