U dei u shynrang briew ha ka rta 40 – 50 snem, lada don ba ithuh pyntip mar dor : SP

Mawkyrwat, Nailur 02 : Ka ophis u Superintendent jong ki Pulit ka South West Khasi Hills District, Mawkyrwat, ka pyntip sha ki paidbah halor kawei ka metïap jong uwei u briew bym pat lah ban ithuh, uba la antad ba u don hapdeng ka 40 – 50 snem ka rta.
Katkum ka jingpyntip na u bah B. Jyrwa, MPS, Superintendent jong ki Pulit ka South West Khasi Hills District, Mawkyrwat u la ong ba ïa ka metïap jong une u rangbah la ïoh ban tam ne sei ha ka 29 tarik u ‘Nailar, 2026, ha ka por kumba 4:20 janmiet, ha kawei ka wah kaba ki khot ka Photpyntoh kaba hap hapoh ka shnong Mawranglang, Lai Kyntoit, South West Khasi Hills District, Meghalaya.
Ym tangkata, u la ong ba la shem ïa ka met jong utei u briew ha ka jinglong kaba la pyut bha, ha kaba ka met ka thiah ha ka rukom ba la kyllaiñ hapdeng ki maw hapoh ka wah. Hadien kata, ïa ka met jong u, la pynkynriah ne kit noh sha Civil Hospital, Shillong, ha kaba la pynlong ïa ka Inquest bad Post-Mortem Examination.
“Katkum ka jingbatai shaphang une u briew uba la khlad ka long: ba u dei u shynrang, ka rta la shu antad ha ka karta 40–50 snem, ka jingjrong kumba 5 phut, ki jaiñ ba u phong ka long Adidas half-pant rong blue dum (Navy Blue), kiwei kiwei ki tiar ba u ne u briew u don ki long kawei ka bangle bad u sacred thread (Taviz) ba la teh ha ka kti kamon kaba shalor bad ka jinglong jong ka met ka long ba ka la pyut bha”, ong u SP.
Shuh shuh u la ong ruh ba watla la shim ïa ki lad ki lynti baroh ban ithuh ïa utei u briew, hynrei haduh mynta ym pat lah ban pynshisha ïa ka jingithuh jong u.
Namarkata, u la kyrpad ba kino kino ki briew kiba don jingtip ne ïoh jingithuh shaphang kane ka metïap, ne kiba don ki ba ha ïing, ki paralok ne ki briew ba la tip ïa ki kiba la jah, u la kyrpad ban pyntip mar mar sha u Officer – in – Charge jong ka Mawkyrwat Police Station, ne sha Ophis jong u Superintendent of Police, South West Khasi Hills District, khnang ba lah ban pynshisha ïa ka met jong u b bad ban pyntip sha ka ïing ka sem jong u, lada don.
“Ka jingïatreilang jong ki paidbah ban ïarap ban ithuh ïa u briew, ka long kaba donkam bha”, u la ong. U la kyrpad ruh ïa ki paidbah ban phriang ïa kane ka khubor sha kiwei, khnang ba lah ban pynithuh ïa ka metïap bad ban pyntip sha ki ba haïing hasem, lada don.
U la buh ruh ka jingkyrpad ba na ka bynta ki jingtip, sngewbha ïakren bad lane pyntip ha u Officer-in-Charge, Mawkyrwat Police Station ha u 9863398734.